Garajyn esirtki qoımasyna aınaldyrǵan semeılikten 154 kg marıhýana tárkilendi
ASTANA. KAZINFORM — Іshki ister mınıstrligi «Zań men Tártip» qaǵıdatyn iske asyrý aıasynda esirtki jetkizý arnalarynyń jolyn kesýge baǵyttalǵan is-sharalardy júrgizip jatyr, dep habarlaıdy Polisia.kz.
Mamyr aıynyń basynda Semeı qalasynda keshendi jedel-izdestirý men arnaıy is-sharalar nátıjesinde eldiń ońtústik óńirlerinen jetkizilgen kannabıs tobyna jatatyn esirtkiniń arnasy joıyldy.
Júrgizilgen tintý sharalary barysynda 35 jastaǵy jergilikti turǵynnyń garajynan jalpy salmaǵy 154 kılogramm bolatyn asa iri kólemdegi marıhýana anyqtalyp tárkilendi. Esirtki odan ári Abaı oblysy aýmaǵynda taratý maqsatynda tsellofan qaptamalaryna oralǵan.
— Qazir Qylmystyq kodekstiń 297-babynyń 3-bóligi boıynsha esirtki quraldarynyń zańsyz aınalymyna qatysy bar barlyq kúdiktini anyqtaý jáne ustaý boıynsha sotqa deıingi tergep-tekserý sharalary júrgizilip jatyr. Kúdikti ýaqytsha ustaý ızolıatoryna qamaldy. ІІM eskertedi: esirtki jetkizý arnalaryn qurýdyń kez kelgen áreketi qatań túrde toqtatylady. Atalǵan baǵyttaǵy jumys jalǵasady, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Budan buryn Almatyda 20 jastaǵy kýrerden 2,5 keli esirtki tárkilengenin jazdyq.
