Garajda otalyp turǵan kólik adam ómirine qaýip tóndirýi múmkin
PETROPAVL. KAZINFORM – Petropavldaǵy kópbeıindi qalalyq jedel medıtsınalyq járdem aýrýhanasyna kómirtek totyǵynan ýlanǵan áıel jetkizildi.
Emdeý mekemesiniń málimetinshe, ol qozǵaltqyshy qosýly turǵan kóliktiń ishinde, jabyq garajda shamamen 20 mınýt otyrǵan. Keıin gazdyń ıisin sezip, kóliktiń qozǵaltqyshyn óshirgenimen, garajdan shyqpaı, salonda uıyqtap qalǵan.
Oıanǵannan keıin áıel ózin jaısyz sezingen. Alaıda dárigerge tek kelesi kúni álsizdik, júrek aıný, qusý, bas aınalý jáne bas aýrýy basylmaǵan soń ǵana kóringen.
Tekserý barysynda onyń qanyndaǵy karboksıgemoglobın deńgeıi 13% bolǵan. Bul – áıeldiń kómirtek totyǵymen ýlanǵanyn kórsetedi. Naýqas aýrýhananyń terapııa bólimine jatqyzyldy.
Qazir jaǵdaıy jaqsarǵanymen, emdeý áli jalǵasyp jatyr.
- Ýly gaz tússiz ári ıissiz. Sondyqtan adam onyń aýada bar ekenin baıqamaı, ýlanǵanyn tym kesh túsinýi múmkin. Ol otteginiń aǵzaǵa jetkizilýine kedergi keltiredi. Sonyń saldarynan mı, júrek jáne basqa da mańyzdy aǵzalar ottegi tapshylyǵyna ushyraıdy, - deıdi dárigerler.
Iis tıip, ýlanyp qalýdyń aldyn alý úshin, kóliktiń qozǵaltqyshyn jabyq garajda qospaǵan jón. Mamandar, tipti, qozǵaltqyshty garajdyń esigin ashyp qoıyp ta qyzdyrýdyń densaýlyqqa qaýipti ekenin eskertedi. Sondaı-aq, kóliktiń jylytý qurylǵylarynyń jaramdylyǵyn tekserip, jeldetý júıesiniń durys jumys isteýin qadaǵalap otyrý mańyzdy.
Al ýlaný belgileri bolǵan jaǵdaıda, dereý taza aýaǵa shyǵyp, 103 nemese 112 nómirine habarlasý kerek.
Buǵan deıin avtokólikke arnalǵan áınek jýǵysh suıyqtyqty tańdaǵan kezde onyń qaýipsizdigine kóz jetkizýdiń mańyzyn jazǵan edik.
