«Garant 24 Lombard», «EЅTATE Lombard» isi: 17 myńnan astam jábirlenýshi shaǵym túsirgen
NUR-SULTAN. QazAqparat – Jyl basynan beri Іshki ister organdary qarjy pıramıdalaryn uıymdastyrý men qurý boıynsha 217 qylmystyq isti tergep, 116 isti sotqa joldady, dep habarlaıdy QazAqparat.
QR ІІM Tergeý departamentiniń basshysy Sanjar Ádilovtyń aıtýynsha, jalpy sany 79 kúdikti jaýapqa tartylýda. ІІM Tergeý departamenti túrli qarjy pıramıdalaryna qatysty 13 qylmystyq isti tergep jatyr.
«Máselen, «Garant 24 Lombard», «EЅTATE Lombard» jáne «Tıimdi qaryz» JShS boıynsha jábirlenýshilerden 17 myńnan astam shaǵym kelip tústi. 22 mlrd teńgeden astam somaǵa materıaldyq zalal kelgeni anyqtaldy. Atalǵan uıymdardyń basshylaryna qatysty 32 qylmystyq is tirkeldi, 51 kúdikti qylmystyq jaýapqa tartylýda, 7 kúdiktige izdeý salyndy», - dedi S. Ádilov mınıstrliktiń onlaın brıfınginde.
Spıker qarjy pıramıdalary týraly qylmystyq isterdi tergeý aıasynda Qazaqstannan tys jerlerde de kúdiktilerdi ustaý sharalary júrgizilgenin atap ótti.
«Ulttyq gvardııanyń arnaıy borty Moldova Respýblıkasynan, Reseı jáne Qyrǵyzstan Respýblıkasynan úsh kúdiktini jetkizdi. Qazirgi ýaqytta tergeý sharalary júrip jatyr», - dedi departament basshysy.
Kúdiktilerden 70 mln teńgeden astam aqsha tárkilengen. Tergeý amaldaryn júrgizý barysynda ІІM jedel-tergeý toby 2 mlrd teńgeden astam somaǵa kúdiktilerdiń múlkin anyqtady jáne tárkiledi.
«Qylmystyq isterdi tergeý tájirıbesi kórsetkendeı, qarjy pıramıdalary – tez baıyp ketýdi qalaıtyn, joǵary tabysty ýáde etetin agressıvti jarnamaǵa qarsy tura almaıtyn azamattarymyzdyń «soqyr» seniminiń nátıjesi. Biz turaqty túrde BAQ arqyly halyqqa qarjy pıramıdalarynyń qylmystyq isteri týraly túsindirý jumystaryn júrgizemiz, biraq bul – jetkiliksiz. Mundaı aýqymdy jumysty múddeli memlekettik organdar – Ulttyq bank, Qarjy mınıstrligi, Aqparat jáne qoǵamdyq damý mınıstrligi de júrgizip jatyr», - dedi Sanjar Ádilov.
