Ǵanı Sádibekov pen Baqytjan Jaqsalıevti úıqamaqta ustaý merzimi uzartyldy

ASTANA. QazAqparat - Burynǵy QR Energetıka vıtse-mınıstrleri Ǵanı Sádibekov pen Baqytjan Jaqsalıevti úıqamaqta ustaý merzimi 1 qyrkúıekke deıin uzartyldy, dep habarlaıdy QazAqparat tilshisi. Bul týraly Astana qalasy №2 Almaty aýdandyq sotynyń baspasóz qyzmeti málim etti.

Sonymen birge, kúdikti Serikbaı Jumalınovty qamaýda ustaý merzimi 1 qyrkúıekke deıin, Jan Nurbekovty úıqamaqta ustaý 2018 jyldyń 2 qyrkúıegine deıin uzartyldy.

Energetıka vıtse-mınıstri Ǵ. Sádibekovke «Aımaq» JShS merdigerlik uıymynyń basshysy D. Dýanbekpen sóz baılasyp, Şýchınsk-Býrabaı kýrorttyq aımaǵyndaǵy kóldi tazartýǵa bólingen asa iri mólsherdegi bıýdjet qarajatyn jymqyrdy degen aıyp taǵylyp otyr. Qylmysqa Energetıka mınıstrliginiń departament basshysy J. Nurbekov jáne merdiger uıymnyń ókilderi S. Jumalınov jáne B. Qadyrberlın de qatysqan.

Al, Baqytjan Jaqsalıev Şýchınsk-Býrabaı kýrorttyq aımaǵyndaǵy kóldi tazartý boıynsha jumystardy qabyldaý barysyndaǵy zańǵa qaıshy áreketterge bardy dep aıyptaldy. Kúdikti vıtse-mınıstr 2015 jyly «Aımaq ı K» JShS merdiger uıymynyń múddesi úshin laýazymdyq ókilettigin asyra paıdalanǵan.

Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosynyń habarlaýynsha, B.Jaqsalıev oryndalǵan jumystyń kólemi 30 ese artyq baǵalanǵanyn bile otyryp, jalpy somasy 863 mln teńgeni quraıtyn sý qoımasynyń túbinen 109 myń tekshe metr shógindilerdi alý týraly aktilerge qol qoıyp, atalǵan somany merdigerge aýdarǵan. Sot saraptamasynyń qorytyndysy boıynsha aıaqtalmaǵan jumystardyń quny 746 mln teńgeni qurady.