Ǵanı Sádibekov isi boıynsha kýáger: Qujattarǵa qol qoıýǵa májbúr boldym
Sot otyrysy barysynda QR Energetıka mınıstrligi qaldyqtardy basqarý departamentiniń burynǵy sarapshysy Nazgúl Álimsýrına kýáger retinde málimdeme jasady, dep habarlaıdy QazAqparat tilshisi.
Nazgúl Álimsýrına Energetıka mınıstrliginde 2015 jyldan beri jumys istegen. Onyń kýálik etýi boıynsha, 2017 jyldyń qańtarynda Energetıka mınıstrliginiń departament basshysy J.Nurbekovtyń tapsyrmasymen ol Şýche-Býrabaı kýrorttyq aımaǵynda Qarasý kólin tazartý jobasyn júrgize bastaǵan.
«Men 2017 jyldan bastap Qarasý kólin tazartý boıynsha jobany odan ary júzege asyrýmen aınalysa bastadym. Qarjy mınıstrligine bıýdjettik ótinimdi toltyryp, osy másele boıynsha hat almasý isin júrgizdim. Bul joba maǵan tapsyrylǵan kezde aqpan aıynda departament dırektorymen Býrabaıdaǵy Qarasý kóline sý men balshyq synamalaryn alý úshin bardyq», - dedi Nazgúl Álimsýrına Nur-Sultan qalalyq sotynda.
Onyń aıtýynsha, buıryq boıynsha jobaǵa Energetıka departamentiniń dırektory J.Nurbekov jaýapty, al eks-vıtse-mınıstr Ǵanı Sádibekov bıýdjettik baǵdarlamanyń jetekshisi bolǵan.
«Bizben birge «Aımaq jáne K» JShS merdigerlik uıymynyń dırektory D.Dýanbek, bas merdiger K. Ismaǵambetov, zerthana ókilderi boldy. Tógindi shógindilerin tekserý barysynda tazartý jobasy boıynsha júrgizilmegen degen qorytyndyǵa keldik», - deıdi kýáger.
Onyń málimdeýinshe, «Aımaq jáne K» JShS merdigerlik uıymynyń dırektory D.Dýanbektiń qatysýymen júrgizilgen zertteýdń nátıjesinde 2014-2016 jyldar aralyǵyndaǵy jumystyń nashar oryndalǵany, tunba shógindileri tolyǵymen alynyp tastalmaǵany anyqtalǵan.
«Tıisinshe, Qarasýdan kelgennen keıin biz J.Nurbekov ekeýmiz tazalyq durys júrgizilmegen ári jumys aıaqtalmaǵan degen qorytyndyǵa keldik. Biz jetekshi vıtse-mınıstr Ǵanı Sádibekovke joba boıynsha jumys durys júrgizilmeı jatqandyǵyna qatysty pikir bildirdik», - dep túsindirdi kýáger.
Ol sonymen qatar 2017 jyldyń naýryz-sáýir aılarynda merdiger tólem jasaý úshin jumys aktilerin usynǵanyn atap ótti.
«Osydan keıin Nurbekov Sádibekovke «Aımaq jáne K» JShS jasaǵan zańbuzýshylyqtar týraly habarlap, atalǵan aktilerge qol qoıýdan bas tartty. Nurbekov sonymen birge jumys qunyn 5 mıllıardtan 7,5 mıllıard teńgege deıin kóterý ózgerisine kúmán bildirdi», - dep qosty ol.
Sonymen qatar, N.Álimsýrına 2017 jyldyń naýryz aıynyń ortasynda Energetıka mınıstrliginiń Qarjy departamenti Qarasý kólin tazartý mqsatynda tehnıkalyq qadaǵalaýdy tartý úshin konkýrs jarııalaǵanyn tilge tıek etti. Konkýrstyq komıssııanyń tóraǵasy Ǵanı Sádibekov bolǵan.
Konkýrs barysynda departament dırektorynyń orynbasary S. Aqylbekov Álimsýrınaǵa Energetıka mınıstrligi basshylyǵynyń tapsyrmasy boıynsha «Stroııntegratsııa» JShS-ǵa artyqshylyq berilýi kerektigin aıtqan. «Stroııntegratsııa» JShS Energetıka mınıstrligimen tehnıkalyq qadaǵalaý qyzmetin usyný týraly kelisim jasasqannan keıin Álimsýrına eks-vıtse-mınıstrdiń talaby boıynsha oryndalǵan jumystyń jalǵan aktilerin maquldaǵan.
«Departament dırektory ekeýmiz vıtse-mınıstrge bul qujatqa qol qoıýdyń qajeti joqtyǵyn aıttyq. Óıtkeni onda batımetrııalyq zertteýler júrgizilmegen. Biraq men bul jobalarǵa qol qoıýdan bas tarttym. Óıtkeni men jumystyń durys oryndalǵanyna senimdi bolǵan joqpyn. Tıisinshe, men dırektoryma bul týraly aıtyp, aktilerge qol qoıýdy qalamaıtynymdy aıttym. Biraq basshylyq tarapynan bizdiń ol qujattarǵa qol qoıýymyz kerektigi týraly naqty nusqaýlar boldy. Jaǵdaıdyń ýshyqqany sonshalyq, vıtse-mınıstr meniń qol qoıý aktilerimdi qabyldamaı «eger men aktilerge qol qoımasam, óz erkimnen jumystan ketýime bolady» dedi. Ol kezde mende amal bolmady», - dedi N. Álimsýrına.
Eske sala keteıik, eks-vıtse-mınıstr Ǵanı Sádibekov qylmystyq is materıaldary boıynsha konkýrstyq komıssııanyń tóraǵasy bolyp turyp, «Stroııntegratsııa» JShS-ǵa basymdyq bergeni úshin aıyptalýda.