Ǵanı Qaınazarov Qazaqstan fýtbol lıgasynyń prezıdenti boldy
ASTANA. KAZINFORM - Qazaqstan fýtbol lıgasy (QFL) prezıdenti qyzmetine Ǵanı Qaınazarov keldi.
Bul sheshim Lıgaǵa múshe klýbtar ókilderiniń kezekten tys otyrysynda qabyldandy. Daýys berýshilerdiń kópshiligi Ǵ.Qaınazarovtyń kandıdatýrasyn maquldady.
Qazaqstandyq jankúıerler Ǵanı Qaınazarovtyń esimin jaqsy biledi. Fýtbol mamany mansabynda ár ýaqytta «Qaırat» pen «Taraz» klýbtarynda oıyn kórsetip, ulttyq qurama sapynda el namysyn qorǵady. 1996 jyly «Taraz» sapynda el chempıony atandy.
Fýtbolshy mansabyn aıaqtaǵan soń, «Tarazda» prezıdent, «Astanada» sport dırektory qyzmetin atqardy. Sondaı-aq, Qazaqstan fýtbol federatsııasynda qurama komandalar departamentiniń dırektory boldy. Bıyl QFL vıtse-prezıdenti retinde taǵaıyndaldy.
Eske salsaq, budan buryn Qazaqstan fýtbol lıgasynyń prezıdenti qyzmetin atqarǵan Rafael Garıbıan qyzmetinen ketti.
Ol Qazaqstan fýtbol lıgasy prezıdenti qyzmetin 2023 jyldyń 2 mamyrynan bastap atqardy.
