Ǵanı Qasymov Qapshaǵaıdan jańa áýejaı salý máselesin kóterdi
ASTANA. 21 aqpan. QazAqparat - Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Ǵanı Qasymov Qapshaǵaı qalasynan jańa áýejaı salý máselesin kóterdi.
«Úkimette buǵan deıin Qapshaǵaı qalasynda jańa áýejaı salý máselesi birneshe dúrkin talqylanǵany belgili. Bul joba perspektıvaly ári Almaty qalasyndaǵy áýejaıǵa túsetin aýyrtpashylyqty jeńildetetin múmkindigi eskerilip, asa qajetti nysan retinde qarastyrylyp kelgen edi. Alaıda, qarjylyq qolbaılaý problemasynan bul joba júzege aspaı qalǵany belgili», - deıdi senator Ǵanı Qasymov.
Osyǵan oraı, depýtat Úkimet otyrysynda asa qajetti sanalatyn áýejaı qurylysy máselesin taǵy bir márte qaraýdy suraıdy. Onyń aıtýynsha, Qapshaǵaı qalasynda áýejaı salynatyn bolsa, nysan jańa júk aınalymyn arttyryp, tranzıttik avıatasymaldy damytý mindetin sheship qana qoımaı, qolaısyz aýa raıy týyndaǵan shaqta Almaty aerotoraby úshin qosymsha aerodrom rólin de atqarar edi.
«Bunymen qosa, «EKSPO-2017» halyqaralyq kórmesin ótkizý aıasynda sheteldik azamattar men týrısterdiń mol nópirin eskersek, jańa áýejaı bizdiń elimizdiń avıatsııalyq salasyn odan ári damytýǵa tyń serpin berer edi», - deıdi Ǵ. Qasymov.
