Ǵanı Beısembaev ózin keden qyzmetkerleri qalaı qorqytqanyn aıtty

ASTANA. KAZINFORM – Oqý-aǵartý mınıstri Ǵanı Beısembaev Astanada ótip jatqan aýyl mektepterindegi pedagogterdiń respýblıkalyq forýmynda ózin keden qyzmetkerleri qalaı qorqytqanyn eske aldy.

«Bıyl qańtar aıynda Londondaǵy Bett show-dan qaıtyp, Astana áýejaıynda ushaqtan túsken kezde qyzyq oqıǵaǵa tap boldym. Keden qyzmetiniń eki adamy maǵan qaraı júgirdi. Sál qorqynyshty bolyp ketti. Bilmeımin ǵoı endi. Keden qyzmetkerleri saǵan qaraı júgirse, neshe túrlini oılaısyń ǵoı. Qolyńdy qaıyryp, ustap alýy múmkin degendeı. Bilmeımin endi, eshqandaı tártip buzbaǵan sııaqty edim... Eshqandaı qylmysym da joq. Degenmen, kim biledi?» - dep eske aldy mınıstr.

Aıtýynsha, ol oqıǵanyń sebebin keıin baryp bilgen.

«Álgi eki jigit júgirip keldi de, kúlimdep, bir shabadanymdy alyp, bireýi qoltyqtap, kedendik baqylaýdan kezeksiz ótkizip jiberdi. Sodan keıin baryp betime kúldi.

«Aǵaı, bizdi tanyǵan joqsyz ba? Biz sizdiń shákirtińizbiz ǵoı», - deıdi. 

Munyń ózi naǵyz ustaz bola bilseń, qaı jerde júrseń de seniń shákirtteriń túrli qyzmetterde bolady. Sen únemi qurmetti, qalaýly qonaq bolasyń. Qaı qyzmettiń ókilin, qaı mamandyqtyń ókilin osylaı qurmetteıdi? 

Sondyqtan muǵalim degen eń uly qyzmet ekenin únemi este ustańyzdar», - dedi Ǵanı Beısembaev.

Aıta ketý kerek, aýyl pedagogteriniń respýblıkalyq forýmy aıasynda mınıstr jas ustazdarǵa ashyq trenıng ótkizip jatyr.