Ǵanı Beısembaev oqýshyny jezókshelikke májbúrleý daýyna qatysty pikir bildirdi
ASTANA. KAZINFORM – Oqý-aǵartý mınıstri Ǵanı Beısembaev Qyzylorda oblysynda kámeletke tolmaǵan qyzdy jezókshelikpen aınalysýǵa májbúrleý faktisine qatysty pikir bildirdi.
«Birinshiden bul máseleniń bárin jiti anyqtaý kerek. Men oblys ákimimen bul suraqqa baılanysty tyǵyz baılanystamyn jáne olarǵa bizdiń ustazdarǵa qatysty jedel sheshim qabyldamaýdy suradym. Óıtkeni bas-aıaǵyn anyqtap alý kerek. Qazir ishki ister organdary da bul máselede asyǵystyq tanytpaýdy aıtyp otyr. Men bul sheshimmen kelisemin. Sondyqtan ár máseleniń artynda adam taǵdyry turǵannan keıin sheshim qabyldaýda abaı bolýymyz kerek», - deıdi Oqý-aǵartý mınıstri elordadaǵy Tamyz konferentsııasynda.
Eske salsaq, Qyzylorda qalasynda mektep oqýshylary «synyptasyn seks-quldyqta ustady» degen kúdikke ilindi. Bir top jasóspirim 16 jastaǵy qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady. Oqýshy qyzdyń ata-anasy jaǵdaıdy qoǵamdyq qorǵa habarlaǵan.
Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.
Oqıǵaǵa baılanysty №7 mektep-lıtseı dırektory, tárbıe isi jónindegi orynbasary, psıhology, áleýmettik pedagogi, synyp jetekshileri jumystan bosatyldy.
