Ǵanı Beısembaev oqý jylynyń nelikten uzartylǵanyn túsindirdi

ASTANA. QazAqparat – QR Oqý-aǵartý mınıstri Ǵanı Beısembaev bıylǵy oqý jylyn qorytyndylady, dep habarlaıdy QazAqparat tilshisi.

«Oqý jylynyń aıaqtalýyna sanaýly kúnder qaldy. Mınıstrlik aldynda turǵan mańyzdy mindetterdiń biri – bıylǵy oqý jylyn tabysty aıaqtaý jáne balalardyń jazǵy demalysy men saýyqtyrýyn sapaly uıymdastyrý, ári qaýipsizdigin tolyq qamtamasyz etý», - dedi mınıstr Úkimet otyrysynda.

Bıylǵy jańalyq – elimizde oqý jyly 34 aptadan 36 aptaǵa deıin uzartyldy. Osyǵan sáıkes oqý jyly 31 mamyrda aıaqtalady.

«Bul sheshimniń basty sebepteri: balalardyń otbasynda kóbirek ýaqyt ótkizýine qatysty ata-ana ótinishteriniń eskerilýine baılanysty 5 kúndik oqý aptasyna kóshý; oqýshylarǵa júktemeni azaıtý jónindegi sarapshylar usynysy; oqý aptasynyń uzaqtyǵyn Ekonomıkalyq yntymaqtastyq jáne damý uıymynyń standarttaryna sáıkestendirý. Álemdik tájirıbege nazar aýdarsaq, EYDU elderinde oqý jyly 40 aptany quraıdy», - dep túsindirdi Ǵ.Beısembaev.

Onyń aıtýynsha, álem oqýshylary jazǵy kanıkýlda 77 kún ǵana demalsa, elimizdiń oqýshylary úshin 13 apta nemese 90 kún demalys belgilengen.