Ǵanı Beısembaev mekteptiń bedeli úshin oqýshyny kolledjge aýysýǵa májbúrleıtinderdi anyqtaýdy tapsyrdy

Oqý-aǵartý mınıstri Ǵanı Beısembaev mekteptiń bedeli úshin nashar oqıtyn oqýshylardy kolledjderge aýysýǵa májbúrleý faktileri bar ekenin aıtty, dep habarlaıdy Kazinform agenttigi. 

«Oqý-aǵartý mınıstrligi tarapynan muǵalimder nemese mektepter arasyndaǵy reıtıng máselesi joq ekenin taǵy bir basa aıtqym keledi. Deı turǵanmen keıbir jekelegen mektepterde belgisiz reıtıngiler týraly áńgime qozǵalatyn sııaqty. Osyǵan baılanysty keıbir mektepterde oqýshylardy óziniń erkinen tys kolledjge aýysýǵa májbúrleý faktileri kezdesetin kórinedi. Sondyqtan barlyq bilim basqarmalaryna, bólimderine jáne mektep ákimshiligine eshqandaı zańǵa sáıkes kelmeıtin balalardy negizsiz kolledjder men basqa da mekemelerge aýysýyna májbúrleý faktilerine qadaǵalaý júrgizip, olarǵa jol bermeýdi tapsyramyn», - dedi Ǵanı Beısembaev apparat jınalasynda.

Sondaı-aq mınıstr sózinshe, mektepterdi lıtsenzııalanǵan kúzetpen qamtý máselesinde áli de kemshilik bar.