Ǵanı Beısembaev «Qytaı – Ortalyq Azııa» Bilim mınıstrleriniń alǵashqy keńesine qatysty
ASTANA. KAZINFORM – Úrimshi qalasynda Qytaı Halyq Respýblıkasy men Ortalyq Azııa elderi – Qazaqstan, Ózbekstan, Qyrǵyzstan, Tájikstan jáne Túrikmenstannyń Bilim mınıstrleri, sondaı-aq tıisti vedomstvolar men dıplomatııalyq korpýs ókilderiniń qatysýymen alǵashqy keńes ótti.
QR Oqý-aǵartý mınıstrligi málimetinshe, jıynnyń basty taqyryby bilim berý salasyndaǵy ıntegratsııa men ornyqty áriptestikti qurý máseleleri boldy.
Qazaqstan Oqý-aǵartý mınıstri Ǵanı Beısembaev óz sózinde qatysýshy elder arasyndaǵy yntymaqtastyqty nyǵaıtý men bilim berý boıynsha ortaq bastamalardy júzege asyrýdyń mańyzdylyǵyn atap ótip, tehnıkalyq jáne kásiptik bilim berý salasyndaǵy odan arǵy ózara is-qımyldyń negizgi baǵyttaryna toqtaldy.
– Qazaqstanda Memleket basshysy Qasym-Jomart Toqaevtyń bastamasymen 2025 jyl Jumysshy mamandyqtar jyly dep jarııalandy. Qazir tehnıkalyq jáne kásiptik bilim berý júıesinde aýqymdy ózgerister júzege asyp jatyr. Internatsıonaldandyrý aıasynda álemniń jetekshi kolledjderi men óndiristik kásiporyndarymen seriktestik ornatylyp, bıznes qaýymdastyqpen yntymaqtastyq keńeıip jatyr, pedagogter men stýdentter úshin akademııalyq utqyrlyq jetildirilip jatyr. Qazaqstan yntymaqtastyqqa ashyq jáne jahandyq eńbek naryǵynda suranysqa ıe kadrlardy daıarlaýǵa baǵyttalǵan ortaq tásilderdi ázirleýdi qoldaıdy, – dedi Ǵanı Beısembaev.
Keńes qorytyndysy boıynsha qatysýshy elder Bilim mınıstrleriniń keńesi mehanızminiń Jarǵysyn jáne «Úrimshi deklaratsııasyn» qabyldady. Bul qujattar aldaǵy yntymaqtastyqtyń negizin aıqyndap, joǵary bilikti mamandar daıarlaý isiniń basymdyqtaryn bekitedi.
Aıta keterligi, kelesi mınıstrler keńesi Qazaqstanda ótedi. Rotatsııa tártibine sáıkes, Ortalyq Azııa elderi men Qytaıdyń Bilim mınıstrleriniń ekinshi keńesin ótkizý quqyǵy men tóraǵalyq bizdiń elge berildi.
Aıta keteıik, Oqý-aǵartý mınıstri Ǵanı Beısembaev Reseıde 3 qazaq mektebin salý máselesine qatysty pikir bildirdi.