Ǵanı Beısembaev Qazaqstannyń oqý-aǵartý mınıstri retinde qandaı isterimen este qaldy
ASTANA. KAZINFORM – Ǵanı Beısembaev Oqý-aǵartý mınıstrligin 2023 jyldyń 4 qańtarynan 2025 jyldyń 29 qyrkúıegine deıin basqardy.
Búgin Memleket basshysy ony qyzmetinen bosatty.
Ǵanı Beısembaevtyń jetekshiligimen vedomstvo mektepke deıingi, orta, tehnıkalyq jáne kásiptik bilim, qosymsha oqytý men balalardyń quqyqtaryn qorǵaý salalarymen aınalysty.
Ol úsh aýysymdy mektepter sanyn qysqartý máselesine nazar aýdardy. Ǵanı Beısembaevtyń aıtýynsha, byltyr osyndaı mektepterdiń sanyn 70-ke qysqartý múmkin boldy. Biraq úsh aýysymdyq mektepter áli de Astanada, Almatyda jáne búginde jańa nysandar kóptep salynyp jatqan basqa birqatar óńirde saqtalǵan.
Byltyr elimizde 267 myń oqýshyǵa arnalǵan 232 jańa mekteptiń qurylysy bastaldy, onyń 83-i 1 qyrkúıekte paıdalanýǵa berildi. Jyl sońyna deıin taǵy 111 nysandy iske qosý josparlanǵan. Oǵan qosymsha 245 mektepti jańǵyrtý qolǵa alyndy.
Mınıstr óz sózinde jańa mektepterdi salý óńir ekonomıkasyna áser etetinin aıtty: tek pedagogter úshin 30 myń jańa jumys orny paıda bolady.
Sondaı-aq Qazaqstanda buryn-sońdy bolmaǵan jańa úlgidegi mektepter salynyp jatyr. Ulttyq joba — bilim berý júıesinde tyń ári aýqymdy ınfraqurylymdyq bastamany iske asyrýdyń nátıjesi. Ǵanı Beısembaev jaıly mektepterdi «Keleshek mektepteri» dep ataýdy usyndy.
Budan bólek burynǵy Oqý-aǵartý mınıstri muǵalimderdi artyq mindetterden bosatýǵa kúsh saldy. Onyń paıymynsha, muǵalimniń eń basty mindetteriniń biri – balaǵa sapaly bilim berý. Ustaz esh nársege alańdamaýy tıis.
Ǵanı Beısembaev vedomstvony basqarǵan ýaqytta mektep dırektorlarynyń eńbekaqysy ósti.
2023 jyly ol barlyq mektep kúzet quraldarymen 100% qamtylatyndyǵyn aıtty.
Sondaı-aq 2024 jyly Ǵanı Beısembaev Qazaqstanda 9 mektepte ǵana dárethana dalada ornalasqanyn tilge tıek etti.
Onyń aıtýynsha, budan úsh jyl buryn mundaı oqý oryndarynyń sany 3 myńnan asqan edi. Keıin mınıstrlik 2025 jyldyń sońyna deıin mektepterdegi dala dárethanalary joıylyp, olardyń ornyna mektep ishinde dárethanalar salynatyndyǵyn jetkizdi.
Mektep formasy jáne bilim ordasyna hıdjabpen kelý máselesi birneshe ret kópshiliktiń talqysyna tústi. Ǵanı Beısenbaev: «2016 jyly bekitilgen oqýshylardyń mektep formasy men kıimine qatysty buıryq bar. Ol ózgergen joq. Sondyqtan balalar bilim ordasyna mektep formasymen kelýi kerek», - dep bul máselege núkte qoıdy.
Ol barlyq bilim berý uıymdaryna, onyń ishinde jeke mektepterge de ortaq tártip erejeleri qoldanylatynyn atap ótti. Eger zań buzýshylyqtar týraly aqparat tússe, mınıstrlik olardy tekserýge daıyn ekenin málimdedi.
Buǵan deıin Oqý-aǵartý mınıstri bolyp Juldyz Súleımenova taǵaıyndalǵanyn jazǵan edik.