Gandboldan ótetin 11-shi Azııa chempıonatynda Qazaqstan quramasy fınalda oıyn kórsetýge tyrysady
ALMATY. 13 qyrkúıek. QazAqparat /Erbol Azanbek/ - Erteń Almatyda jalaýyn kóteretin 21 jasqa deıingi qyzdar arasyndaǵy gandboldan 11-shi Azııa chempıonatynda Qazaqstan quramasy fınalda óner kórsetý úshin oınaıdy. Bul týraly búgin Almatyda arnaıy ótken baspasóz máslıhatynda qyzdar quramasynyń aǵa jattyqtyrýshysy Májıt Kármenuly aıtty.
«Bizdiń quramanyń sapynda 16 sportshy óner kórsetedi. Sportshylarymyz babynda. Chempıonat barysynda fınalda oıyn kórsetý basty maqsatymyz», - dedi aǵa jattyqtyrýshy. Eske sala keteıik, Qazaqstannyń qyzdar quramasy buǵan deıin 3 ret Azııa chempıony atanǵan bolatyn.
Atalǵan jarysqa buǵan deıin habarlaǵanymyzdaı, Azııa elderiniń 8 komandasy qatysady. 20 qyrkúıekte aıaqtalatyn oıyn qorytyndysy boıynsha Azııa chempıony anyqtalady. Sonymen qatar 1-4 oryn ıelengen komandalar 2012 jyly Chehııada ótetin Álem chempıonatyna joldama alady.
«Azııa chempıonatyn elimizde ótkizýdegi maqsat - elimizde salaýatty ómir saltyn, gandbol sportyn nasıhattaý, komandalardyń deńgeıin kóterý. Bizge gandboldan Azııa qurlyǵyndaǵy kóshbasshy retinde osy bıik deńgeıdi ustap turý tapsyrylǵan. Sondyqtan atalǵan gandboldy damytý, nasıhattaý, osyndaı halyqaralyq deńgeıdegi sharalardy ótkizý basty maqsatymyz»,- dedi baspasóz máslıhaty barysynda Qazaqstan gandbol federatsııasynyń prezıdenti Gúlnar Turlyhanova.
Onyń aıtýynsha erteń bastalatyn Azııa chempıonaty Qazaqstanda ótetin gandbol saıystarynyń sońy emes. Aldaǵy 2-6 qarasha aralyǵynda budan da iri shara, Halyqaralyq gandbol federatsııasynyń kýbogy úshin saıys ótedi. Aıtýly dodaǵa tórt qurlyqtyń komandalary qatyspaq.
