Gandboldan Qazaqstan áıelder quramasy álem chempıonatyn sátsiz bastady

ASTANA. KAZINFORM — Búgin gandboldan Qazaqstan áıelder quramasy 2025 jylǵy álem chempıonatynda alǵashqy oıynyn Angolaǵa qarsy ótkizdi.

Angola quramasy osal qarsylas emes bolatyn. Afrıka qurlyǵynda on bes márte chempıondyq ataqty jeńip alǵan olar 1996 jyldan beri Olımpıadaǵa turaqty túrde qatysyp keledi. Ázirge joǵary jetistigi retinde 2016 jyly 8 oryn alǵandyǵy tirkelip otyr.

Al álem chempıonatyna 1990 jyldan beri turaqty túrde baq synap keledi. Olar 2007 jyly jetinshi orynǵa taban tiregen edi.

Kezdesý barysynda angolalyq gandbolshylar belsendi oıyn kórsetti. Nátıjesinde otandastarymyz birinshi kezeńde qarsylasyna 9:21 esebimen ese jiberdi.

Ekinshi kezeńde de qazaqstandyq sportshylar jınaqy qımyl kórsete alǵan joq. Afrıka qurlyǵynan kelgen gandbolshylar basymdyqty arttyra tústi.

Osylaısha Qazaqstan quramasy qarsylasyna 20:38 esebimen ese jiberdi.

Dúbirli dodada barlyǵy 32 qurama synǵa túsedi. Otandastarymyz H tobynda Norvegııa, Ońtústik Koreıa jáne Angolamen oınaıdy.

Endi otandastarymyz 30 qarashada Norvegııa, 1 jeltoqsanda Ońtústik Koreıamen sheberlik baıqasady.

Álem chempıonaty 2025 jyldyń 26 qarasha jáne 14 jeltoqsan aralyǵynda ótkiziledi.