Gandboldan Azııa chempıonaty: Qazaqstan qyz quramasy 2-oryn aldy
NUR-SULTAN. QazAqparat - Almaty qalasynda 18 jasqa deıingi jasóspirim qyzdar arasynda gandboldan Azııa chempıonatynda qazaqstandyqtar ekinshi oryn aldy, dep habarlaıdy QazAqparat tilshisi.
Qurlyqtyq dodada barlyǵy bes qurama synǵa tústi. Olardyń qatarynda Iran, Ózbekstan, Qazaqstan, Úndistan jáne Sırııa quramalary bar.
Qazaqstandyq gandbolshylar tórtinshi kezdesýde Ózbekstandy 31:29 esebimen tize búktirdi. Odan buryn Sırııadan 32:14, Úndistannan 28:21 esebimen basym túsken edi.
Al alǵashqy kezdesýde Iranǵa 19:20 esebimen jol berip qoıdy.
Nátıjesinde birinshi oryn segiz upaımen ırandyq qyzdarǵa buıyrsa, alty upaımen qazaqstandyq gandbolshylar ekinshi orynǵa taban tiredi. Odan keıingi oryndarǵa Ózbekstan, Úndistan jáne Sırııa qyzdary ilikti.
