Gandboldan Azııa chempıonaty: Qazaqstan erler quramasy Úndistannan basym tústi

MANAMA. KAZINFORM - Qazaqstan quramasy Bahreın astanasy Manama qalasynda gandboldan erler arasyndaǵy Azııa chempıonatynda 13-oryn úshin synǵa túsedi.

Búgin tórtinshi topta qazaqstandyq gandbolshylar Úndistan quramasynan 25:24 esebimen basym tústi.

Jarystyń atalǵan satysynda qazaqstandyq gandbolshylar Qytaıǵa 24:43, Omanǵa 29:30 esebimen jeńilgen edi.

Nátıjesinde óz tobynda úshinshi orynǵa turaqtap, 13-oryn úshin synǵa túsýge múmkindik aldy. Endi olarǵa úshinshi topta úshtikke ilikken qurama qarsylas atanady.

Atalǵan oıyndar 22-23 qańtar kúnderine belgilengen.

Qazaqstandyq gandbolshylar jarystyń alǵashqy satysynda D tobynda synǵa tústi. Aldymen Bahreınnen 13:47, Birikken Arab Ámirliginen 15:39 esebimen jeńilip, Gonkongty 27:22 esebimen tize búktirdi.

Qazaqstan quramasy bıyl qurlyqtyq dodaǵa úshinshi márte qatysyp otyr. 1998 jyly segizinshi orynǵa taban tirese, 1993 jyly on birinshi oryndy mise tutty.