Gandboldan álem chempıonaty: Qazaqstan jarystyń kelesi satysyna shyqty
NUR-SULTAN. QazAqparat - Búgin gandboldan álem chempıonatynda Qazaqstan qyzdar quramasy úshinshi oıynyn Iranǵa qarsy ótkizdi, dep habarlaıdy QazAqparat tilshisi.
Qazaqstan qyzdary S tobynda synǵa tústi. Qarsylastary - Norvegııa, Rýmynııa jáne Iran quramalary.
Búgingi kezdesýde qazaqstandyq gandbolshylar sátti oıyn kórsetti. Nátıjesinde birinshi kezeńde qarsylasynan 14:10 esebimen basym tústi.
Ekinshi kezeńdi de dál osyndaı qarqynda ótkizdi. Qazaqstandyq oıynshylar óz múmkindigin múlt jibergen joq. Bul kezeńde olar qarsylastar qaqpasyna 17 gol soqsa, óz qaqpasyna 15 gol jiberip aldy.
Kezdesýde Qazaqstan qyzdary qarsylasyn 31:25 esebimen tize búktirdi. Osylaısha jarystyń negizgi satysyna shyqty.
Aıta ketsek, eki qurama arasyndaǵy búgingi kezdesýde úshinshi oryn taǵdyry sheshiledi. Árbir toptan úzdik úshtikke ilikken quramalar jarysty jalǵastyrýǵa múmkindik alatyn. Alǵashqy eki kezdesýde jeńiske jetken Norvegııa men Rýmynııaǵa ondaı múmkindikke erterek ıe bolǵan edi.
Eske salsaq, budan buryn ulttyq qurama Norvegııa men Rýmynııaǵa ese jiberdi.
Álem chempıonaty 1-19 jeltoqsan aralyǵynda Ispanııanyń Lırııa, Kastelon, Granolers, Torreveha qalalarynda ótkiziledi. Dúbirli dodada barlyǵy 32 qurama baq synaıdy.
