Gandboldan álem chempıonaty: Qazaqstan Shvetsııaǵa ese jiberdi
NUR-SULTAN. QazAqparat - Búgin gandboldan álem chempıonaty negizgi satysynda Qazaqstan qyzdar quramasy Shvetsııamen kezdesti, dep habarlaıdy QazAqparat tilshisi.
Endi atalǵan toptaǵy úshtikke ilikken quramalar D tobyndaǵy Nıderlandy, Shvetsııa jáne Pýerto-Rıkomen ekinshi topqa biriktirildi. Jarys erejesi boıynsha endi árbiri buryn kezdespegen qarsylasymen kúsh synasady.
Búgingi kezdesýdi qazaqstandyq gandbolshylar sátti bastaǵan edi. Alǵashqy mınýttarda qarsylas qaqpasyna jıi gol soqty. Nátıjesinde 3:1 esebimen alda turdy. Odan keıin shvetsııalyq sportshylar basymdyq tanytty.
Kezdesýde qazaqstandyq gandbolshylar qarsylasyna 20:55 esebimen ese jiberdi.
Qazaqstandyq gandbolshylar endi 11 jeltoqsanda Nıderlandymen kezdesse, 13 jeltoqsanda Pýerto-Rıkomen sheberlik baıqasady.
Eske salsaq, ulttyq qurama irikteý satysynda S tobynda synǵa tústi. Qarsylastary - Norvegııa, Rýmynııa jáne Iran quramalary. Norvegııa men Rýmynııaǵa ese jiberip, Iran quramasyn tize búktirdi. Osylaısha óz tobynda úshinshi orynmen jarystyń negizgi satysyna joldama aldy.
