Gandboldan álem chempıonaty: Qazaqstan búgin Shvetsııamen kezdesedi
NUR-SULTAN. QazAqparat - Búgin gandboldan álem chempıonaty negizgi satysynda Qazaqstan qyzdar quramasy Shvetsııamen kezdesedi, dep habarlaıdy QazAqparat tilshisi.
Oıyn elorda ýaqytymen 01:20-da bastalyp, Qazsport telearnasynan tikeleı efırde kórsetiledi.
Shvetsııa quramasy budan buryn 2020 jyly Tokıo Olımpıadasynda tórtinshi oryn aldy. Ázirge álem chempıonatyndaǵy eń joǵary jetistigi retinde 2017 jyly 4 oryn alǵanyn aıtýǵa bolady.
Eske salsaq, ulttyq qurama irikteý satysynda S tobynda synǵa tústi. Qarsylastary - Norvegııa, Rýmynııa jáne Iran quramalary. Norvegııa men Rýmynııaǵa ese jiberip, Iran quramasyn tize búktirdi. Osylaısha óz tobynda úshinshi orynmen jarystyń negizgi satysyna joldama aldy.
Endi atalǵan toptaǵy úshtikke ilikken quramalar D tobyndaǵy Nıderlandy, Shvetsııa jáne Pýerto-Rıkomen ekinshi topqa biriktirildi. Jarys erejesi boıynsha endi árbiri buryn kezdespegen qarsylasymen kezdesý ótkizedi.
Qazaqstandyq gandbolshylar búgin Shvetsııadan ózge endi 11 jeltoqsanda Nıderlandymen kezdesse, 13 jeltoqsanda Pýerto-Rıkomen sheberlik baıqasady.
Qazaqstan quramasy buǵan deıin álem chempıonatynyń fınaldyq satysynda 5 márte baq synady. 2007 jyly – 18, 2011 jyly – 19, 2009, 2015, 2019 jyldarda 22-oryndy qanaǵat tutty. Al Olımpıada oıyndarynda 2008 jyly 10-oryn aldy.
Álem chempıonaty 1-19 jeltoqsan aralyǵynda Ispanııanyń Lırııa, Kastelon, Granolers, Torreveha qalalarynda ótkiziledi. Dúbirli dodada barlyǵy 32 qurama baq synaıdy.
