Gandboldan álem chempıonatynda Qazaqstan áıelder quramasy Egıpetke ese jiberdi

ASTANA. KAZINFORM - Búgin gandboldan Qazaqstan áıelder quramasy 2025 jylǵy álem chempıonatynyń 24-32 oryndar úshin pleı-off satysynda ekinshi topta Egıpetke ese jiberdi.

Otandastarymyz úshinshi kezdesýde afrıkalyq qarsylastaryna 18:30 esebimen jeńilip qaldy. 

Oǵan deıin olar Kýbaǵa 28:29, Qytaıǵa 30:32 esebimen jol berdi. 

Al irikteý satysynyń toptyq kezeńinde qazaqstandyq gandbolshylar Angolaǵa 20:38, Norvegııaǵa 16:41, Ońtústik Koreıaǵa 17:35 esebimen jeńilip qaldy.

Endi olar 10 jeltoqsanda 31-oryn úshin Iranmen sheberlik baıqasady.

Qazaqstandyq gandbolshylar 2008 jyly Olımpıadada 10-orynǵa alǵan edi. Odan keıingi jyldarda dúbirli dodadan tys qaldy.

Otandastarymyz qazirge deıin álem chempıonatynda jeti márte baq synady. Olardyń joǵary jetistigi - 2007 jylǵy 18-oryn.

Dúbirli dodada barlyǵy 32 qurama synǵa túsip jatyr.

Gandboldan áıelder arasyndaǵy álem chempıonaty 1957 jyldan beri turaqty túrde ótkizilip keledi. Qazirge deıin Reseı - 7, Norvegııa men Germanııa -4, Frantsııa - 3, Vengrııa, Serbııa, Danııa, Rýmynııa, Nıderland, Chehoslovakııa, Ońtústik Koreıa men Brazılııa -1 márte chempıon atandy.