Gandboldan álem chempıonaty: Qazaqstan áıelder quramasy búgin Angolamen kezdesedi
ASTANA. KAZINFORM - Búgin gandboldan Qazaqstan áıelder quramasy 2025 jylǵy álem chempıonatynda alǵashqy oıynyn ótkizedi.
Dúbirli dodada barlyǵy 32 qurama synǵa túsedi. Otandastarymyz H tobynda Norvegııa, Ońtústik Koreıa jáne Angolamen oınaıdy.
Qazaqstanlyq gandbolshylar búgin saǵat 21:50-de Angolamen kezdesedi. Match «Qazsport» telearnasynan tikeleı efırde kórsetiledi.
Eki qurama buǵan deıin 2008 jyly 17 tamyzda Olımpıadada kezdesip, oıyn 24:24 esebimen teń aıaqtaldy.
Angola quramasy Afrıka qurlyǵynda on bes márte chempıondyq ataqty jeńip alǵan. Sondaı-aq olar 1996 jyldan beri Olımpıadaǵa turaqty túrde qatysyp keledi. Ázirge joǵary jetistigi retinde 2016 jyly 8 oryn alǵandyǵy tirkelip otyr.
Al álem chempıonatyna 1990 jyldan beri turaqty túrde qatysyp keledi. Olar 2007 jyly jetinshi orynǵa taban tiregen edi.
Qazaqstandyq gandbolshylar 2008 jyly Olımpıadada 10-orynǵa alǵan edi. Odan keıingi jyldarda dúbirli dodadan tys qaldy.
Otandastarymyz qazirge deıin álem chempıonatynda jeti márte baq synady. Olardyń joǵary jetistigi - 2007 jylǵy 18-oryn.
Álem chempıonatyna qatysatyn quramalar
A toby: Danııa, Rýmynııa, Japonııa, Horvatııa,
V toby: Vengrııa, Shveıtsarııa, Senegal, Iran
S toby: Serbııa, Germanııa, Islandııa, Ýrýgvaı
D toby: Ispanııa, Chernogorııa, Farer araldary, Paragvaı
E toby: Nıderland, Aýstrııa, Argentına, Egıpet
F toby: Frantsııa, Polsha, Týnıs, Qytaı
G toby: Shvetsııa, Brazılııa, Chehııa, Kýba
H toby: Norvegııa, Angola, Ońtústik Koreıa, Qazaqstan
Álem chempıonaty 2025 jyldyń 26 qarasha jáne 14 jeltoqsan aralyǵynda ótkiziledi.