Gandbol: Qazaqstan qyzdar quramasy Azııa birinshiliginde oınaıdy
ASTANA. QazAqparat - Erteń, 30 qarashada Japonııanyń Kýmamoto qalasynda gandboldan qyzdar arasynda Azııa birinshiligi jalaýyn kóteredi. Oǵan Qazaqstan quramasy da qatysady, dep habarlaıdy QazAqparat tilshisi.
Azııa birinshiliginde barlyǵy 10 qurama baq synaıdy. Bizdiń qyzdar A tobynda synǵa túsedi. Qarsylastary - Avstralııa, Japonııa, Iran, Jańa Zelandııa. Qazaqstan quramasy alǵashqy oıynyn 30 qarashada Avstralııaǵa qarsy ótkizedi. Odan keıin 1 jeltoqsanda Iranmen sheberlik baıqassa, 2 jeltoqsanda Jańa Zelandııamen oınaıdy. Al 5 jeltoqsanda Japonııamen kezdesedi.
Al V tobynda Ońtústik Koreıa, Qytaı, Úndistan, Gonkong, Sıngapýr quramalary básekege túsedi.
Fınal men 3 oryn úshin saıys 9 jeltoqsanda bolady.
Qazaqstan qyzdar quramasy buǵan deıin eki márte Azııa chempıony ataǵyn jeńip aldy. Alǵash 2002 jyly Ońtústik Koreıadan 27:25 esebimen basym tússe, 2010 jyly sol qarsylasyn fınalda 33:32 esebimen jeńdi. Atalmysh eki Azııa birinshiligi de Almaty qalasynda ótkizilgen edi. Sondaı-aq, bizdiń qurama sońǵy úsh Azııa birinshiliginde tórtinshi orynǵa turaqtady. Búgingi kúnge deıin Qazaqstan quramasy Azııa birinshiligine toǵyz márte qatysqan.
Jalpy alǵanda, Azııa birinshiligi 1987 jyldan beri turaqty túrde ótkizilip keledi. Búgingi kúnge deıin nebári úsh qurama ǵana qurlyq chempıony atanǵan. Qazaqstannan basqa Ońtústik Koreıa men Japonııa osyndaı tabysqa qol jetkizgen. Ońtústik Koreıa 13, Japonııa 1 márte altynnan alqa taqty.
