Ganadan Katonqaraǵaıǵa: sheteldik ustaz aýyl balasyn til men STEM-di meńgerýge yntalandyrady
ÓSKEMEN. KAZINFORM — Ganadan kelgen ustaz Ebenezar Ieboa Ovýsý aýyldyq balalar úshin jahandyq bilimdi jaqyndatatyn bastamanyń alǵashqy qatysýshysy boldy.
Qazaqstanda aýyl mektepterindegi balalardyń aǵylshyn tilin meńgerý múmkindikterin keńeıtýge baǵyttalǵan «Balalarǵa arnalǵan aǵylshyn tili» bilim berý jobasy iske qosyldy. Furo.kz habarlaýynsha, el tarıhynda alǵash ret aýylǵa sheteldik maman kelip, balalarǵa sabaq berý arqyly tildik orta qalyptastyryp otyr. Ol Shyǵys Qazaqstan oblysy Katonqaraǵaı aýylyndaǵy S. Lastaev atyndaǵy mektepte jumys isteıdi. Aıta ketsek, bul mektep 2019 jyldan beri Bilim berýdi turaqty damytý qorynyń jobasyna qatysyp keledi.
- Búgingi tańda aǵylshyn tili – jahandyq bilimniń kilti. Ǵylymı eńbekterdiń, jańa tehnologııalar men bilim berý bastamalarynyń basym bóligi osy tilde bastalady. Alaıda Qazaqstannyń aýyl mektepteri áli de bilikti maman tapshylyǵy men aǵylshyn tildi ortanyń joqtyǵyn sezinedi, – deıdi Bilim berý salasyn turaqty damytý qorynyń jetekshisi Danııar Toqtarbaev.
Osy máseleni sheshý úshin Bilim berý salasyn turaqty damytý qory AITAS holdınginiń negizin qalaýshy Serik Tolyqpaevtyń qoldaýymen «Balalarǵa arnalǵan aǵylshyn tili» jobasyn iske qosty. Joba aıasynda sheteldik muǵalimder shaqyrylyp, oqýshylardy halyqaralyq emtıhandarǵa (IELTS, TOEFL) daıyndaý, synı oılaýdy damytý jáne zamanaýı oqytý ádistemelerin engizý kózdelgen.
Alǵashqy sheteldik pedagog – Ganadan kelgen Ebenezar Ieboa Ovýsý. Ol jaratylystaný ǵylymdary boıynsha pedagogıka magıstri, 2025 jyly Nazarbaev ýnıversıtetinde bilim berý salasy boıynsha PhD baǵdarlamasyn támamdaǵan. Osy ýaqytqa deıin Ganada bıologııa, matematıka jáne jaratylystaný pánderinen sabaq berip, halyqaralyq konferentsııalarǵa qatysyp, ǵylymı jýrnaldarda maqalalar jarııalaǵan.
- STEM baǵytyna negizdelgen transdıstsıplınarlyq bilim berý salasyn zertteýmen aınalysamyn. Jaratylystaný pánderin oqytýdaǵy tájirıbem maǵan STEM tujyrymdamalaryn óner men tilder arqyly túsindirýge múmkindik berdi. Qazaqstandyq jaǵdaıda STEM tilderdi oqytýǵa, al tilder STEM-di oqytýǵa sep bola alady. Bul stýdentterdiń transdıstsıplınarlyq saýattylyǵyn damytady, – deıdi Ebenezar Ieboa Ovýsý.
Ganadan kelgen ustaz Bilim berý salasyn turaqty damytý qorynyń shaqyrýyn qýana qabyldaǵanyn aıtady. Óıtkeni bul onyń ómirlik mıssııasyna tolyq sáıkes keledi.
- Maqsattarymnyń biri – bilimdi BUU-nyń Turaqty damý maqsattary arqyly damytý. Bul joba maǵan sondaı múmkindik berdi. Katonqaraǵaıdy tabıǵatty oqytý quraly retinde paıdalanyp, jergilikti resýrstar arqyly jahandyq quzyretterdi damytýǵa bolatyn orta dep bilemin. Bul – tabıǵatpen etene aralasý ári oqý protsesi. Jobanyń damý qarqynyna jáne jaǵdaılarǵa baılanysty munda kem degende 2-3 jyl bolamyn dep oılaımyn, – deıdi ol.
Atalǵan joba úsh jylǵa josparlanǵan. Osy ýaqyt ishinde sheteldik muǵalimder aǵylshyn tilinen bólek, pánaralyq sabaqtar júrgizip, fakýltatıvter ótkizedi, oqýshylardy debatqa, teatr qoıylymdaryna, ǵylymı úıirmelerge, jazǵy lagerler men sheteldik mekteptermen birlesken onlaın-jobalarǵa qatystyrady. Bul tolyqqandy aǵylshyn tildi orta qalyptastyryp, balalardy yntalandyrady ári XXI ǵasyr daǵdylaryn damytady.
Jaqyn arada bastamaǵa AQSh, Nıgerııa, Fılıppın jáne basqa da elderden ustazdardy tartý josparda bar.
Bilim berý salasyn turaqty damytý qory jobalary qatarynda: «NIS Powered aýyl mektebi», «Aýyldyq tirek mektepterdiń áleýetin damytý», «Google for Education» – Google-dyń bilim berý quraldaryn aýyl mektepterine engizý jobasy bar. Sonymen qatar Qor Soltústik Qazaqstandaǵy shaǵyn jınaqty mektepterdi damytyp, Mańǵystaý oblysynda «Otpan» jobasy aıasynda 50 tirek mektepti damytyp keledi.
Aıta keteıik, mektep oqýshysy Abaıdyń danalyq sózderin negizge ala otyryp shyǵarǵan planer-kúndelik aǵylshyn tilin úırenýge de kómektesedi.