Ganada maımyl sheshegi taralyp jatyr

ASTANA. KAZINFORM – Gana bıligi maımyl sheshegi (Mpox) vırýsynyń taǵy 20 jańa jaǵdaıyn tirkedi. Sóıtip, mamyr aıynan beri juqtyrǵandardyń jalpy sany 302-ge jetti, dep habarlaıdy Anadoly.

Gana Densaýlyq saqtaý qyzmetiniń (GHS) málimdeýinshe, ótken aptada indet bastalǵaly beri naýqastar sanynyń eń úlken ósimi tirkeldi. Sonymen qatar, epıdemıologııalyq jaǵdaıdy jańartý barysynda mańyzdy betburys baıqaldy: buǵan deıin bul vırýs ólimge ákelmegen bolsa, 28 shildede alǵashqy ólim jaǵdaıy tirkeldi.

Málimdemede vırýs negizinen juqtyrǵan adammen tyǵyz fızıkalyq baılanys kezinde taralatyny atap kórsetilgen. Bılik halyqty saqtyq sharalaryn qatań ustanýǵa jáne qandaı da bir belgiler paıda bolǵan jaǵdaıda dereý habarlaýǵa shaqyrdy.

Bıylǵy alǵashqy Mpox jaǵdaılary Ganada 19 mamyrda tórt adamnan anyqtalǵan bolatyn. Sodan beri úkimet vırýs taralýynyń aldyn alý maqsatynda joǵary qaýip tobyna jatatyn adamdardy vaktsınatsııalaý naýqanyn júrgizip keledi.

Jyl basynda Dúnıejúzilik densaýlyq saqtaý uıymy maımyl sheshegi indetin halyqaralyq deńgeıdegi tótenshe jaǵdaı retinde baǵalaýdy jalǵastyryp otyrǵanyn málimdegen edi.