Gambýrgte Helloýın kezinde júzdegen adam búlik shyǵardy

Gambýrgte Helloýın merekesi kezinde tártipsizdikter boldy. Gambýrg polıtsııasy qalanyń ońtústik aýdanynda birneshe júz adamǵa qarsy sý atqyshtaryn qoldanýyna týra keldi, dep habarlaıdy Kazinform agenttigi DW jańalyqtaryna silteme jasap.

Alǵashynda qalanyń ońtústik aýdanyna 200-ge jýyq adam - basym bóligi jastar jınalsa, keıin olardyń qatary 300-350-ge jetti. Jınalǵandar polıtsııanyń birneshe ret eskertkenine qaramastan, taramaǵan.

Polıtsııanyń habarlaýynsha, tártip saqshylaryna petarda laqtyrylǵan, al polıtseıler jınalǵandardy yǵystyryp, sý atqyshtaryn qoldanǵan.

Sonymen qatar, birazy qamaýǵa alyndy. Zardap shekkender týraly málimet joq. Qalanyń taǵy bir bóliginde 50-ge jýyq jas petarda atyp, dúken terezelerin syndyryp, qoqys konteınerlerin órtep jibergen.