Gambýrg mýzeıinde Ertis óńiri tarıhynan syr shertetin 500 sýret saqtaýly
Mundaı pikirdi belgili tarıhshy-arheolog, PMPÝ-degi Margulan Centre ortalyǵynyń dırektory Tımýr Smaǵulov «Nur Otan» partııasy basshylyǵynyń oblysqa saparmen kelýine oraı jıylǵan partııalyq aktıv otyrysynda bildirdi. Sondaı-aq, tarıhshylardyń aldynda turǵan mindettermen tanystyryp ótti.
«Arhıv-2025» baǵdarlamasy aıasynda arhıvterde úlken jumystar júrgizý josparlanýda. Odan bólek, sheteldik mýzeılerde saqtalǵan materıaldardy zertteý de kózdelýde. Nege deseńizder, sheteldik, onyń ishinde reseılik mýzeılerde óńir tarıhyna qatysty talaı qundy derekter saqtaýly»,- deıdi Tımýr Smaǵulov.
Onyń aıtýynsha, Máskeý memlekettik tarıh mýzeıinde akademık V.V. Radlovtyń Pavlodar qalasy mańynda júrgizgen qazba jumystarynyń kollektsııasy saqtaýly. Sonymen qatar, Reseı etnografııalyq mýzeıinde sonaý XIX ǵasyrda Pavlodar ýezinen alynǵan kıiz úı áli kúnge deıin kórermen nazaryna usynylyp keledi. Budan bólek, XIX ǵasyrda belgili etnograf Samýıl Dýdınniń óńirimizdi fotosýretke túsirgen 500 negatıvi Gambýrg qalasynyń etnografııalyq mýzeıinen oryn alǵan.
« Osy 500 sýrette qazaqtardyń turmysy, salt-dástúrleri jáne materıaldyq mádenıeti beınelengen. Atalǵan qaınar kózderdi zertteý, olardy ınternet saıttar men mýzeılerde kórmege qoıylýy arqyly tarıhymyzǵa basqasha kózqaraspen qaraýǵa múmkindik týady», - deıdi Tımýr Smaǵulov. Belgili tarıhshy-arheolog 2019 jyly PMPÝ-da «Jazǵy ýnıversıtet» jobasy júzege asyryla bastaıtyndyǵynan habardar etti. Atalǵan joba aıasynda Pavlodar, Ekibastuz, Aqsý qalalary jáne oblys aýdandarynda jazǵy arheologııalyq mektepter jumys isteıdi. Odan basqa, Toraıǵyr kólinde mektep oqýshylary men stýdentterge arnalǵan ǵylymı-zertteý stansasy ashylady. Sonymen birge, óńirimizde ejelgi tehnologııalardy zertteıtin «Umaı» zerthanasyn ashý josparlanýda.
