Gambýrg halqy qalada Olımpıada ótkizýge qarsy daýys berdi
ASTANA. KAZINFORM — Gambýrg turǵyndary referendýmda 2036, 2040 nemese 2044 jyldary Olımpıada jáne Paralımpıada oıyndaryn ótkizýge ótinim berýge qarsy daýys berdi, dep habarlaıdy Report.
Daýys sanaý tolyq aıaqtalmaı turyp-aq qatysýshylardyń kópshiligi qalanyń kandıdat retinde usynylý ıdeıasyn qoldamaıtyny belgili bolǵan. Jergilikti saılaý komıssııasynyń basshysy Olıver Rýdolftyń málimetinshe, daýys berýge 652 193 adam qatysqan, bul 49,5% saılaýshylar belsendiligine sáıkes keledi. Daýys berý quqyǵy 1,3 mıllıonnan astam 16 jastan asqan turǵynǵa berilgen.
Osylaısha, Gambýrg 2015 jylǵy jaǵdaıdy qaıtalady: ol kezde de qala turǵyndary 2024 jylǵy Olımpıadaǵa ótinimdi qabyldamaǵan edi (qarsy bolǵandar — 51,6%).
Bul sheshim Germanııa ishindegi Olımpıadaǵa úmitker qalalar arasyndaǵy básekeden Gambýrgtiń shyǵýyna ákeldi. Qazir tizimde Berlın, Mıýnhen jáne Reın–Rýr óńiri qaldy. Germanııanyń Olımpıadalyq sport konfederatsııasy (DOSB) eldiń biryńǵaı kandıdatyn 26 qyrkúıekte anyqtaıdy.
Gambýrg turǵyndary sheshimdi negizinen qarjylyq táýekeldermen, kólik ınfraqurylymyna túsetin salmaqpen, aýqymdy qurylys jumystarymen jáne ekologııalyq saldarmen baılanystyrdy. Sondaı-aq turǵyn úı baǵasynyń ósýi múmkin degen alańdaýshylyq ta aıtyldy.
Germanııa úkimeti buǵan deıin 2040 jylǵy Olımpıada oıyndaryn ótkizý ıdeıasyn qoldaıtynyn bildirgen. Germanııa jazǵy Olımpıadany 1936 jyly Berlınde jáne 1972 jyly Mıýnhende ǵana ótkizgen.
Aıta keteıik, Germanııada azamattyq alý talaptary kúsheıtilýi múmkin.
