Gambýrg áýejaıy barlyq derlik reısti toqtatty

ASTANA. KAZINFORM — Germanııanyń Ver.di kásipodaǵy dúısenbi kúni eldegi 13 iri áýejaıda ereýil uıymdastyrýǵa shaqyrdy. Alaıda Gambýrg áýejaıy ony bir kún buryn bastaýǵa sheshim qabyldady, dep habarlaıdy Euronews.

Germanııadaǵy Gambýrg áýejaıy jeksenbi kúni kenetten jumysyn toqtatty. Buǵan qyzmetkerlerdiń jarııalanbaǵan ereýili sebep boldy.

Josparlanǵan 144 qoný men 139 ushýdyń tek 10-y ǵana oryndaldy.

Bul rette Ver.di kásipodaǵynyń bastamasymen Germanııanyń iri áýejaılarynda jappaı ereýil dúısenbige josparlanǵan edi.

Qatty ashýlanǵan jolaýshylar bolǵan jaǵdaıdy «shekten shyqqandyq» dep atady.

Kásipodaq hatshysy Lars Shtýbbe jarııalanbaǵan ereýildiń maqsaty — úlken áserge qol jetkizý ekenin túsindirdi.

— Biz ereýildi aldyn ala eskertýsiz uıymdastyrdyq, óıtkeni tájirıbemiz kórsetkendeı, jumys berýshi aldyn ala bilse, ony kez kelgen jolmen boldyrmaýǵa tyrysady. Árıne, bul jolaýshylarǵa aýyrtpalyq túsiredi jáne bizdiń áriptesterimiz muny túsinedi. Soǵan qaramastan, olar 100% ereýilge qosyldy, — dedi Shtýbbe.

Qyzmet kórsetý salasy qyzmetkerleriniń Ver.di kásipodaǵy avıatsııalyq qaýipsizdik qyzmetkerlerin 24 saǵattyq eskertý ereýilin ótkizýge shaqyrdy.

Olar dúısenbi kúni tańerteń eldiń 13 áýejaıynda, sonyń ishinde Frankfýrt pen Mıýnhende bastalýy tıis.

Germanııa áýejaılary qaýymdastyǵynyń (ADV) málimetinshe, bul ereýil 500 myńnan astam jolaýshyǵa áser etip, 3 400-den astam reıs toqtatylady dep kútilýde.

Kásipodaqtyń málimdemesinde ereýil «shamamen 25 000 qyzmetkerdiń eńbek jaǵdaıyn jaqsartý» úshin qajet ekeni aıtylǵan.

— Ereýil Gambýrg, Bremen, Gannover, Berlın, Dıýsseldorf, Vıze, Dortmýnd, Keln/Bonn, Leıptsıg/Galle, Frankfýrt, Shtýtgart, Karlsrýe/Baden-Baden jáne Mıýnhen áýejaılarynda ótedi, — dep rastady Ver.di.

Aıta ketelik Germanııada qoǵamdyq kólik jumysshylary jappaı ereýilge shyǵatyny týraly jazǵan edik.