Ǵalymjan Pirmatov teńgeniń jıi qubylýyna qandaı ahýal áser etetinin aıtty

ASTANA. QazAqparat – 2022 jyldyń qorytyndysynda teńge 7,1 paıyzǵa álsiredi. Bul týraly búgin Úkimet otyrysynda QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«2022 jyly geosaıası jaǵdaıdyń shıelenisýi jáne jahandyq qarjy naryqtaryndaǵy qolaısyz ahýal ulttyq valıýtanyń dınamıkasyna teris áser etti. Naýryz aıynda teńge baǵamy 512,17 teńgege deıin álsiregennen keıin mamyr aıynda 414,79 teńgege deıin nyǵaıdy. Jyl qorytyndysy boıynsha teńge baǵamy 1 dollar úshin 462,66 teńgege deıin, ıaǵnı 7,1 paıyzǵa álsiredi», - dedi Ǵalymjan Pirmatov.

Onyń atap ótýinshe, 2022 jyly kvazımemlekettik sektor sýbektileriniń 5,1 mlrd dollar mólsherindegi valıýtalyq túsimdi satýy, respýblıkalyq bıýdjetke ulttyq qordan transfertterdi qamtamasyz etý úshin 4,3 mlrd dollar mólsherinde valıýta satý, Ulttyq banktiń 1,4 mlrd dollar mólsherindegi valıýtalyq ınterventsııalary teńgege qoldaý kórsetti.

«Teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtaǵy ahýalǵa baılanysty bolady. Ikemdi baǵam belgileý valıýta naryǵyndaǵy jumystyń tıimdiligin arttyrýǵa jáne halyqaralyq rezervterdi saqtaýǵa yqpal etedi», - dedi UB tóraǵasy.

Foto: primeminister.kz