Ǵalymjan Pirmatov teńgeniń aıyrbas baǵamyna qysym kórsetetin faktorlardy atady

ASTANA. QazAqparat – Erkin ózgeretin baǵam saıasaty valıýta naryǵynyń jumys isteý tıimdiligin arttyrýǵa yqpal etedi. Bul týraly Úkimet otyrysynda QR Ulttyq banki tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Osy jylǵy qyrkúıekte teńgeniń dollarǵa qatysty baǵamy 1 dollarǵa shaqqanda 476,53 teńgege deıin 0,9 paıyzǵa álsiredi. AQSh Federaldy rezervtik júıesiniń aqsha-kredıt saıasatyn belsendi túrde kúsheıtýi, dollar baǵamynyń jahandyq nyǵaıýy, geosaıası qaqtyǵystardyń shıelenisýi, damýshy naryqtardyń valıýtalaryna sekildi teńgeniń de aıyrbastaý baǵamyna qysym kórsetýdi jalǵastyryp keledi», - dedi Ǵalymjan Pirmatov.

UB tóraǵasynyń atap ótýinshe, erkin ózgeretin baǵam saıasaty valıýta naryǵynyń jumys isteý tıimdiligin arttyrýǵa jáne halyqaralyq rezervterdi saqtaýǵa yqpal etedi.