Ǵalymjan Pirmatov teńge baǵamy týraly: Kerek bolsa taǵy ınterventsııa jasaımyz

ASTANA. QazAqparat – Senat otyrysynan keıin BAQ ókilderiniń saýalyna jaýap bergen Ulttyq bank tóraǵasy Ǵalymjan Pirmatov teńge qatty qunsyzdanyp ketse, ınterventsııa jasaýǵa daıyn ekenderin aıtty, dep habarlaıdy QazAqparat tilshisi.

«Árıne, biz ınflıatsııany boljaǵan kezde teńgeniń basqa valıýtalarǵa shaqqandaǵy baǵamyn eskerip otyramyz. Ulttyq bank qajet bolǵan jaǵdaıda, ıaǵnı dollardyń teńgege qatysty baǵamy qysqa merzimde qatty ósip ketse, ınterventsııa jasaýǵa quqyly. Kerek bolsa, ondaı ınterventsııa jasaımyz. Esterińizde bolsa, byltyr kóktemde 1,5 mlrd dollarǵa ınterventsııa jasadyq. Sol byltyrǵy sáýir aıynan beri ınterventsııa júrgizgen joqpyz. Biraq qajettilik týsa, taǵy da ınterventsııa jasaımyz», - dedi Ulttyq bank basshysy.