Ǵalymjan Pirmatov ınflıatsııanyń tómendeýine yqpal etken syrtqy faktorlardy atady
«Aldyńǵy sheshimde boljanǵandaı, syrtqy ınflıatsııalyq orta álsireýde. Jyl basynan bastap túrli taýar naryqtaryndaǵy qubylmalylyq kúsheıip keledi. Munaı naryǵynda Brent markaly munaıdyń belgilengen baǵasy 1 barrel úshin 80 dollarǵa jýyq deńgeıge deıin 7 paıyzǵa tómendedi. Qysqa merzimde koronavırýsqa shaldyqqandardyń kóbeıýine alyp kelgen Qytaı shekarasynyń ashylýy munaı baǵasynyń qubylýyna sebep boldy. Alaıda, Qytaıdyń koronavırýs shekteýlerdi alýy uzaq merzimdi perspektıvada álemdik ekonomıkanyń ósýine túrtki bolýy múmkin»,- dedi UB tóraǵasy BAQ ókilderine arnalǵan brıfıngte.
Onyń atap ótýinshe, kóptegen iri elderdiń ónerkásibindegi iskerlik belsendiliktiń tómendeýi, AQSh pen Eýropadaǵy retsessııa táýekelderine baılanysty alańdaýshylyqtyń ósýi de munaı baǵasynyń ózgerýine yqpal etti. Embargo engizilýine oraı Reseıden munaı jetkizýdiń tómendeýi jáne OPEK elderinde munaı óndirýdiń qysqarýy jónindegi kelisimge baılanysty munaı baǵasynyń quldyraýyna jol berilmedi.
«Azyq-túliktiń álemdik baǵasy aqyryndap tómendegenmen, joǵary kúıinde qalyp otyr. 2022 jyldyń sáýir aıynan bastap FAO azyq-túlik baǵasynyń ındeksi qysqaryp keledi. Jeltoqsanda 1, 9paıyzǵa qysqardy. Bul ósimdik maıy, dándi daqyldar men et baǵasynyń tómendeýine baılanysty. Jyldyq mánde ındeks 1 paıyzǵa tómendedi», - dedi ol.
Ǵalymjan Pirmatovtyń atap ótýinshe, syrtqy ınflıatsııalyq ortanyń jeńildeýine qaramastan damyǵan elderdiń iri ortalyq bankteri qatań monetarlyq saıasatty júrgizýde. AQSh-tyń Federaldy rezervtik júıesi men Eýropa Ortalyq bankiniń sońǵy sheshimi mólsherlemelerdi 4,5 jáne 2,5 paıyzǵa kóterý boldy.
«Osyndaı jaǵdaılar men qysymnyń álsireýine baılanysty álemdik energetıka men taýar naryqtarynda uzaq ýaqyt ishinde alǵash ret tutynýshylyq ınflıatsııa baıaýlady. Saýda seriktesteri bolyp tabylatyn elderdiń kóbinde ınflıatsııa baıaýlaýda. Qytaıdaǵy ınflıatsııa jeltoqsan aıynda 1,8 paıyzdy qurady. Eýroodaqta tutynýshylyq ınflıatsııa energııa baǵasynyń tómendeýinen 2022 jylǵy qarasha aıynda 11,1 paıyzǵa, Reseıde ınflıatsııa 12, paıyzǵa deıin baıaýlady. Osy faktorlardyń barlyǵy Qazaqstandaǵy ınflıatsııaǵa tómendetý yqpalyn tıgizedi», - dedi Ulttyq bank tóraǵasy.