Ǵalymjan Pirmatov bazalyq mólsherleme nege ózgerissiz qalǵanyn túsindirdi
«Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde saqtaý týraly sheshim qabyldady. Bazalyq mólsherleme boıynsha sheshim kezekti boljamdyq raýndty ótkizýmen birgeqabyldandy. Makroekonomıkalyq kórsetkishter boljamyn jańartýmen qatar ınflıatsııa táýekelderiniń balansyn da baǵaladyq. Qabyldanǵan sheshim eldegi ınflıatsııalyq protsesterdi baıalatýǵa, orta merzimdi perspektıvada ınflıatsııany turaqtandyrýǵa jáne nysanaly mánderge deıin tómendetýge yqpal etedi», - dedi ol BAQ ókilderine arnalǵan brıfıngide.
Onyń aıtýynsha, qańtar aıynda ınflıatsııanyń artýyna eń áýeli azy-túlik baǵasy qatty áser etken.
«Qabyldanǵan sheshimniń birinshi faktory – qazirgi jáne kútiletin ınflıatsııa dınamıkasy. 2023 jylǵy qańtarda jyldyq ınflıatsııa, biz kútkendeı, ósýin jalǵastyryp, 20,7%-dy qurady. 25,7%-ǵa deıin jedeldegen azyq-túlik ónimderi baǵasynyń ósýi ınflıatsııaǵa eń kóp úles qosty. Azyq-túlikke jatpaıtyn taýarlar baǵasynyń ósýi 20,2%-ǵa, qyzmetter baǵasynyń ósýi – 14,2%-ǵa deıin jedeldedi.
Aılyq ınflıatsııa bıylǵy qańtarda 1,1%-dy qurap, tórt aı qatarynan baıaýlaýyn jalǵastyrdy. Aılyq ınflıatsııa tómendegenine qaramastan, ortasha tarıhı mánderden joǵary deńgeıde qalyptasyp otyr.
Bazalyq ınflıatsııa ártúrli baǵalaýlarǵa sáıkes baıaýlaǵanyna qaramastan, ekonomıkada joǵary ınflıatsııalyq ortanyń saqtalýyn kórsetti», - dedi Ǵalymjan Pirmatov.
Aıta keteıik, Ulttyq Banktiń aqsha-kredıt saıasaty komıteti bazalyq mólsherlemeni 16,75% deńgeıinde qaldyrý týraly sheshim qabyldady.
