Ǵalymjan Pirmatov álemdik ekonomıkaǵa sholý jasady
«Bıylǵy mamyrda jahandyq naryqtarda qubylmalylyq saqtaldy. Álemdik ekonomıka geosaıası táýekelder men turaqty joǵary ınflıatsııa aıasynda boldy. Damyǵan elderdiń ortalyq bankteri ınflıatsııamen tabandy kúresetinin jáne monetarlyq talaptardy birtindep qalpyna keltiretinin málimdedi. Álemde aqsha-kredıt talaptary kúsheıip jatyr. Mamyrda AQSh Federaldyq rezerv júıesi mólsherlemeni 50 bazıstik tarmaqqa kóterip, 1 maýsymnan bastap balansty qysqartý bastalǵanyn jarııalady. Jyl sońyna deıin mólsherlemeniń taǵy 200 bazıstik tarmaqqa 3 paıyzǵa deıin kóterilý múmkindigi bar. Bıylǵy shildede Eýropa ortalyq banki 2011 jyldan beri alǵash ret mólsherlemeni birinshi bolyp kóterýi múmkin», - dedi Ulttyq bank tóraǵasy.
Onyń aıtýynsha, uzaq merzimdi oblıgatsııalar kiristiliginiń jyldam ósýi jáne ekonomıkasy damyǵan elderde, ásirese, AQSh-ta aqsha-kredıt saıasatynyń barynsha jyldam kúsheıtilýin kútý táýekeldi aktıvterge azdap qysym kórsetedi. Máselen, mamyrda 2022 jyldyń basynan bastap damyǵan elderdiń aktsııalary 13,6 paıyzǵa tómendedi. AQSh-tyń 10 jyldyq memlekettik baǵaly qaǵazdarynyń kiristiligi 1,33 paıyzǵa ósti.
«14 maýsymdaǵy jaǵdaı boıynsha damyǵan elderdiń aktsııalary jyldyń basynan bastap 21,3 paıyzǵa tómendedi. Bul Amerıka Qurama Shtattarynda 40 jyldaǵy rekordtyq ınflıatsııaǵa baılanysty AQSh-tyń Federaldy rezervtik júıesiniń aqsha-kredıt saıasatyn neǵurlym tezirek qatańdatýyna alańdaýshylyq esebinen boldy. Damýshy elderdiń oblıgatsııalary boıynsha spred ulǵaıyp keledi. Reseı Federatsııasynyń Ýkraınamen qaqtyǵysynyń bastalýymen kúrt ósken jahandyq belgisizdik joǵary deńgeıde qalyp otyr. Geosaıası ahýal shıelenisken jaǵdaıda jahandyq ekonomıkanyń ósý boljamdary tómendeý jaǵyna qaraı qaıta qaralady. Osyǵan baılanysty jahandyq iskerlik belsendiliktiń baıaýlaǵanyna qaramastan ósý aımaǵynda. Mamyrda Global Composite PMI, kóbinese, Qytaıdaǵy karantınniń álsireýine jáne óndiris pen jańa tapsyrystardyń tez ósýine baılanysty 51,5-ke deıin azdap ósti. Óndiristik shyǵyndardyń quny men ónimniń baǵasy rekordtyq qarqynmen ósip keledi. Damyǵan elderde ınflıatsııa rekordtyq deńgeıde saqtalyp otyr», - dedi Ǵalymjan Pirmatov.