Ǵalymjan Pirmatov: 2023 jyly álemde ınflıatsııa baıaýlaıdy

ASTANA. QazAqparat – 2023 jyly álemde ınflıatsııa baıaýlaıdy. Bul týraly Úkimet otyrysynda QR Ulttyq banki tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Kóptegen elde ınflıatsııa nysanaly kórsetkishterden artty. Álemdegi monetarlyq saıasattyń kúsheıýi jáne logıstıkalyq problemalardyń sheshilýi 2023 jyly ınflıatsııanyń baıaýlaýyna ákeledi dep kútilýde. Ekonomıkalyq yntymaqtastyq jáne damý uıymynyń boljamy boıynsha G20 elderinde ınflıatsııa 2022 jylǵy 8,2 paıyzdan 2023 jyly 6,5 paıyzǵa deıin tómendeıdi», - dedi Ǵalymjan Pirmatov.

UB tóraǵasynyń atap ótýinshe, ınflıatsııa boljamy birqatar alǵyshartqa baılanysty. Olar: koronavırýstyń jańa tolqynynyń bolmaýy, Ýkraınadaǵy soǵystyń kúsheımeýi, Eýropadaǵy energııa naryǵyndaǵy qysymnyń tómendeýi. Tyńaıtqyshtar baǵasynyń ósýi, qolaısyz kún raıynyń qateri qosymsha proınflıatsııalyq faktorlar sanalady.

«Ekonomıkalyq yntymaqtastyq jáne damý uıymy naqty mólsherlemege qatysty boljamdy kórsetkishterdiń oń bolýyn eskere kele, ınflıatsııalyq qysymdy tómendetý úshin paıyzdyq mólsherlemelerdi odan ári kóterýdi usynady. Sonymen qatar, Ekonomıkalyq yntymaqtastyq jáne damý uıymynyń pikirinshe, salyq-bıýdjet sharalarynda ınflıatsııa joǵary bolǵan kezeńde budan bylaı turaqty yntalandyrýdan bas tartý jáne qarjylyq turaqtylyqty qamtamasyz etý qajettiligi eskerilýge tıis ekeni mańyzdy», - dedi ol.

Foto: 24kz