Ǵalymjan Qyryqbaı dzıýdodan Grand Slam týrnırinde qola júlde jeńip aldy
TOKIO. QazAqparat - Japonııa astanasy Tokıoda dzıýdodan Grand Slam básekesi aıaqtaldy. Jyldyń qorytyndy dodasynda Qazaqstan quramasy bir medalge qol jetkizdi, dep habarlaıdy QazAqparat.
100 keliden joǵary salmaqta beldesken qazaqstandyq dzıýdoshy Ǵalymjan Qyryqbaı jarys barysynda barlyǵy tórt kezdesý ótkizip, úsheýin jeńispen aıaqtady.
Sportty damytý dırektsııasynyń málimetinshe, erler arasynda asa aýyr salmaqtaǵy Ǵalymjan Qyryqbaı qola medal úshin jekpe-jekte cheh Lýkas Krpalekten basym túsken.
Іrikteýde amerıkalyq Krıstıan Konovaldy jeńgenimen, keıin japon Kokoro Kagıýradan utylyp qaldy.
Jarys qojaıyny fınalǵa shyqqandyqtan Ǵalymjan jubanysh beldesýine qatysýǵa múmkindik aldy. Onda mońǵolııalyq Tsetsensengel Odhýýdy utty.
Sondaı-aq 100 kelige deıingi salmaqtaǵy Nurlyhan Sharhan da qola medal úshin kúresken.
Alaıda qazaq dzıýdoshysy jubanysh kezdesýinde germanııalyq Djordj Ýdsılaýrıdi utqanymen, júlde jolynda jarys qojaıyny Kotaro Ýeokaǵa jol berdi.
Osylaısha 100 kelige deıingi salmaqta tatamıge shyqqan Sharhan Nurlyhan jarysty 5-orynmen aıaqtady.
