«Ǵalymyn syılamaǵan el óziniń bolashaǵyna balta shapqanmen parapar» - respýblıkalyq basylymdarǵa sholý
***
Elimizdiń basty baılyǵy bolyp tabylatyn jer resýrstaryn tıimdi paıdalaný - memlekettiń kókeıkesti strategııalyq maqsattarynyń biri. Osy maqsatqa sáıkes Elbasy Úkimetke, sonyń ishinde Jer resýrstaryn basqarý agenttigine birqatar tapsyrmalar bergen bolatyn. Ol tapsyrmalar qalaı oryndalýda? Onyń ústine búgin osy agenttiktiń alqa májilisi ótpek. Osy oqıǵa aldynda «Egemen Qazaqstan» gazeti agenttiktiń tóraǵasy Qadyrhan Otarovty áńgimege tartqan. Basylymnyń barlyq saýalyna tuşymdy jaýap bergen ol: «Kadrlarǵa baılanysty negizgi másele - agenttiktiń, ásirese onyń óńirlik aýmaqtyq organdarynyń shtattyq quram sanynyń áli de azdyǵy. Aýdandarda, oblystyq mańyzy bar qalalarda bizdiń mamandarymyz joq. Bul týraly talaı ret Úkimetke usynystar engizilip, másele birte-birte sheshimin tabatyn túri bar. Alaıda, ortalyq apparattyń jáne aýmaqtyq organdardyń sanyn jáne kásiptik quramyn kúsheıtý kerek. Bul kún tártibindegi másele», - deıdi.
Jaqynda Han Táńiri shyńyna shyǵýǵa attanǵan ekspedıtsııadan qaraly habar kelip jetti. Osy kezge deıin talaı taýlarǵa shyǵyp, shyńdardy baǵyndyrǵan alpınıst Ádilet Imambekov qaza tapqan. Bul jaıynda «Egemen Qazaqstan» gazeti jazdy. «Qazir alpınıstiń bul jaǵdaıǵa qalaı dýshar bolǵany jóninde eshteńe aıta almaımyz. Bir ǵana belgili nárse, ol qaıtys bolǵan kezde 5 000 metr bıiktiktegi shatyrda bolypty. Odan basqa derek joq. Al Ádilet Imambekov kim edi? Internetten ol týraly kóp nársege qanyǵa aldyq. Alpınıst jigit facebook pen basqa da áleýmettik jelilerde tirkelip, óziniń ǵalamtordaǵy dostarymen jaqsy baılanys ustap turǵan eken. Máselen, facebook áleýmettik jelisiniń ózinde onyń 379 dosy bolypty. Solarmen kezekti shyńdy baǵyndyrýǵa shyqqanda hat jazysyp, habar alysyp turǵanyn baıqaý qıyn emes», - dep jazady basylym «Qyran qazasy qııanda» degen taqyryptaǵy maqalasynda.
***
«Atyraý oblysynyń ákimi Bergeı Rysqalıev munaı-gaz kompanııalary óz qyzmetkerleri úshin vedomstvolyq balabaqsha salý kerek dep esepteıdi», dep jazady «Aıqyn» gazeti búgingi sanyndaǵy «Atyraýdyń ákimi ashýǵa mindi» degen taqyryptaǵy maqalasynda. «Bul máseleni ótken jyldan beri kóterip kelemiz. Bul jaǵdaı iri munaı-gaz kompanııalary basshylarynyń aldynda da aıtyldy. Oryndamaıdy eken, onda basqasha jasaý kerek, memlekettik balabaqshadan iri kompanııa qyzmetkerleriniń balalaryn shyǵarýǵa tapsyrma berdim», - depti oblys ákimi Atyraýda ótken qalalyq máslıhattyń sessııasynda.
Osy basylymda Májilis depýtaty Saǵııatýlla Sársenovpen aradaǵy suhbat «Basyńdy qumǵa tyǵa bergennen másele sheshile salmaıdy» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen halyq qalaýlysy: «Jasyratyny joq, sońǵy ýaqytta elimizdiń jer-jerinde oryn alǵan áleýmettik eńbek daýlarynyń saldary qoǵamdy dúr silkindirdi. Mundaı keleńsizdikter shaǵyn óndirisi bar kásiporyndarda oryn alsa, onyń zardaby orasan bolmas edi. Al Qazaqstannyń keıbir iri óndiris oryndarynda bolǵan jaısyzdyqtar saqtandyrmaı qoımaıdy. Jańaózende, Qyzylordada, Jezqazǵan óńirinde oryn alǵan áleýmettik-eńbek daýlary máseleniń mánisine tereńirek úńilý qajettigin kórsetip berdi», - deıdi.
***
«Alash aınasy» gazetiniń turaqty «Dat!» aıdarynda Abaı atyndaǵy Qazaq memlekettik pedagogıkalyq ýnıversıtetiniń prorektory, fılosofııa ǵylymynyń doktory, professor Aqtolqyn Qulsarıevamen aradaǵy suhbat «Ǵalymyn syılamaǵan el óziniń bolashaǵyna balta shapqanmen parapar» degen taqyryppen berilgen. Ózine qoıylǵan barlyq saýldarǵa tuşymdy jaýap bergen ǵalym: «Ǵalymyn syılamaǵan, mádenıetin álpeshtemegen el óziniń bolashaǵyna balta shapqanmen parapar. Endeshe, qaltasy qalyń boǵanmen, kókiregi kór paqyrdy emes, ınemen qudyq qazǵandaı beıneti bar ǵaqlııaly ǵalymdy, azamattyǵy myqty aqyndy ardaqtańyzdar, aǵaıyn! Olarǵa da gúlzardy kútkendeı kútim kerektigin esten shyǵarmaý qajet», - deıdi.
***
«Ekspress K» gazetiniń jazýynsha, Astana, Almaty, Qaraǵandy jáne Kókshetaý qalasynyń júzden astam stýdenti Work and Travel baǵdarlamasymen demalys kezinde AQSh-qa baramyz dep alaıaqtyń arbaýyna túsip qaldy. Katherine Work and Travel agenttigi atalǵan stýdentterdiń árqaısysynan 2350 dollardan alyp tabandaryn jaltyratqan. Aldanǵan ańqaýlar endi qarjy polıtsııasyna júginýde.
