Ǵalymdardyń bilimin ǵarysh salasyna paıdalaný kerek - Meıirbek Moldabekov
ALMATY. Aqpannyń 12-si. QazAqparat /Erlik Erjanuly/ - Qazaqtyń ál-Farabı atyndaǵy ulttyq ýnıversıteti men Qanysh Sátbaev atyndaǵy ulttyq tehnıkalyq ýnıversıtetinde ǵarysh salasyna arnalǵan jańa kafedra, fakýltet jáne ınstıtýttar ashylady. Ony QR Ulttyq ǵarysh agenttigi tóraǵasynyń orynbasary Meıirbek Moldabekov búgin Almatyda ótken ǵaryshtyq júıeler men keshender jasaý jobalaryn ǵylymı-tehnologııalyq qamtamasyz etý týraly semınarda aıtty,
dep habarlaıdy QazAqparat.
"Jedel ındýstrııalyq-ınnovatsııalyq damýdyń memlekettik baǵdarlamasynyń bir baǵyty - ǵaryshtyq qyzmetti damytý. Biz elimizde buryn-sońdy bolmaǵan jańa ǵarysh salasy óndirisin ornatamyz dep aldymyzǵa úlken maqsat qoıyp otyrmyz. Ol úshin biraz máseleni sheshýimiz kerek. Sonyń ishinde kókeıkesti máseleniń biri - mamandar jaıy. Bizde buryn ǵaryshtyq óndiris bolmaǵandyqtan, elimizde joǵary dárejeli ǵalymdar bolǵanmen olardy ǵaryshtyq tehnıkany jasaýǵa paıdalaný tájirıbesi joq. Al ǵarysh salasyn damytý úshin kóp mamandar kerek", deıdi QR UǴA akademıgi, tehnıka ǵylymynyń doktory, professor Meıirbek Moldabekov. QR Ulttyq ǵarysh agenttigi tóraǵasy orynbasarynyń aıtýynsha, Reseıde, Ýkraınada jáne prezıdenttik "Bolashaq" baǵdarlamasynyń sheńberinde ózge shet elderde daıyndalyp jatqan mamandarmen shektelýge bolmaıdy. Báribir bul da jetkiliksiz. Sondyqtan mamandardy Qazaqstannyń ózinde daıyndaýdy aldyna maqsat etip qoıyp, QazUÝ men QazUTÝ-da jańa kafedra, fakýltet jáne ınstıtýttar ashylmaq. Bul úshin Bilim jáne ǵylym mınıstrligimen kelisip arnaıy baǵdarlamalar men standarttar jasaý qolǵa alynǵan.
"Biraq, bizge mamandar qazir kerek. Ony qaıdan alýǵa bolady? Qazaqstanda ǵylym keńestik dáýirde joǵary deńgeıde damyǵan. Áıtse de ǵalymdar ǵarysh salasynda jumys istegen joq. Tikeleı baılanys bolǵan joq. Sondyqtan joǵary dárejeli ǵalymdardyń birazy qazir óz bilimin paıdalana almaı júr. Sol sebepti biz olardyń bilimin tıimdi paıdalaný úshin osy semınardy ótkizip jatyrmyz. Munda ǵarysh salasynda jumys jasaıtyn arnaıy kásiporynardyń mamandary qandaı jobalardy júzege asyryp jatqany týraly baıandama jasap, ǵalymdardy ǵylymı máselelermen tanystyrýda", deıdi Meıirbek Moldabekov.
