Ǵalymdar: Jylqy adam emotsııalaryn seze alady
ASTANA. QazAqparat - Jylqylar adamdardyń emotsııalaryn seze alady, dep habarlady BBC News aqparattyq portaly Ulybrıtanııa ǵalymdary júrgizgen zertteýge silteme jasap.
Brıtanııalyq Sýsseks Ýnıversıtetiniń zertteýshileri 28 jylqynyń qatysýymen zertteý júrgizdi. Onda jylqylarǵa adamdardyń túrli emotsııalary beınelengen sýretter kórsetildi.
Júrek belsendiligin ólsheıtin quraldardyń arqasynda ǵalymdar teris emotsııaly sýretter janýarlardyń júrek qaǵysyn údetkenin anyqtady.
Sútqorektilerdiń mı qurylymynyń ereksheligine baılanysty sol kózben kórgen aqparat mıdyń oń jaqtaǵy bóligimen óńdeledi. Ol emotsııalardy qabyldaýǵa jaýap beredi. Zertteýshiler atap ótkendeı, tájirıbege qatysqan jylqylar teris emotsııaly sýretterge sol kózben qaraǵan.
