Ǵalymdar Jerden 20 jaryq jylyna deıingi qashyqtyqtaǵy jerden tys órkenıetti izdestirýde
ASTANA. QazAqparat - Berklıdegi Kalıfornııa ýnıversıtetiniń janyndaǵy SETI zertteý ortalyǵynyń mamandary jerden tys órkenıettermen baılanys ornatýǵa jańa áreket jasady.
Jeksenbi kúni álemdik BAQ-ta onyń ókilderi adamzat ómirimen salystyrýǵa bolatyn ǵaryshtyq nysandarǵa arnaıy elektrondy baılanys ornatýdy kózdeıtin baǵdarlama taıaý ýaqytta túpkilikti bekitilmek, dep habarlady.
Olardyń aıtýynsha, Jerden 20 jaryq jylyna deıingi nemese 190 trln. shaqyrym qashyqtyqtaǵy izdeý aımaǵy belgilendi.
«Men ǵaryshta kóptegen órkenıetter bar ekenin joqqa shyǵarmaımyn, alaıda olardyń birde-biri syrtqy álemge ózderiniń ómir súrip jatqany týraly habar bermese, onda eshkim de olardy esh ýaqytta estı almaıdy», - dep málimdedi Zertteý ortalyǵy basshylarynyń biri Devıd Blek. Ol ázirge Jerden jiberiletin joldaýdyń mazmunyn tańdaý júrip jatqanyn aıtty. .
1984 jyly qurylǵan SETI ınstıtýty tabandy, biraq ta ázirge nátıjesiz jerden tys órkenıetterdi izdestirýde. Sońǵy 30 jyl boıy onyń mamandary radıonyń jáne optıkalyq teleskoptyń kómegimen ǵaryshtan basqa órkenıetterden kelip túsetin dabyldardy tabýǵa tyrysýda. .
Qazir olar ózderiniń qyzmet salasyn keńeıte otyryp, ashyq ǵaryshqa bizdiń ómir súrip jatqanymyz týraly sıgnal jiberýdi bastaýǵa sheshim qabyldady.
Degenmen keıbir ǵalymdar mundaı jobalarǵa qatysty ózderiniń qarsylyǵyn bildirdi. Mysalǵa brıtandyq Stıven Hokıng adamzattyń ózderiniń ómir súrip jatqany týraly syrtqy álemge habarlaýy «óte qaýipti» dep málim etti.
«Eger basqa ǵalamshar ókilderi bizge keletin bolsa, onda Kolýmb korablderi jetkennen keıingi Amerıkanyń jergilikti turǵyndarymen bolǵan kep qaıtalanady», - dedi ol. Hokıng jerden tys órkenıetter bar ekenine senimdi. Olardyń birqatary jerdegilerge qaraǵanda anaǵurlym joǵary tehnologııalyq deńgeıde dep sanaıdy ol.
