Ǵalymdar jer betinde qansha kól bar ekenin anyqtady
ASTANA. QazAqparat - Shvetsııa jáne Estonııa ǵalymdary birlese otyryp, alǵash ret jer betindegi kólderdiń sanyn eseptep shyqty, dep jazady Lenta.rý.
Zertteýshilerdiń esebi boıynsha, ǵalamsharymyzda 117 mıllıonǵa jýyq kól bar, ol jer betiniń shamamen 4 paıyzyn alady eken.
Aıta ketý kerek, Grenlandııa men Antraktıdanyń muzdy kólderi zertteýde esepke alynbaǵan.
«Kól jaǵalaýlarynyń jalpy uzyndyǵy ekvator uzyndyǵynan 250 ese kóp. Bul san buǵan deıingi jasalǵan esepten basqa», delingen maqalada. Mamandardyń aıtýynsha, spýtnık arqyly júrgizilgen zertteý barysynda tuman, taý kóleńkesi sekildi kólmen shatastyryp alýǵa bolatyn oryndar sý betin ajyratý baǵdarlamasyna qıynǵa soqqan.
