Ǵalymdar jasóspirim tárbıesindegi qarapaıym olqylyqty myqtap eske saldy
ASTANA. QazAqparat - Brıtanııanyń 20 úzdik joǵary oqý oryndarynyń quramyna kiretin Sasseks ýnıversıtetiniń zertteýshileri 11 men 19 jas aralyǵyndaǵy 409 erikti jasóspirimdi arnaıy ǵylymı zertteý jumysyna qatystyrdy. Ǵylymı jumystyń ereksheligi, barlyq qatysýshylar az qamtylǵan otbasynan shyqqan balalar boldy. Ǵalymdar olarmen qobaljý, kúızelisten shyǵý týraly saýaldar tóńireginde sóılesip, tárbıe jumysyndaǵy qarapaıym tásildi ǵylymı túrde dáleldep berdi, dep jazady The Daily Mail.
Ǵalymdardyń aıtýynsha, zertteý jumysy barysynda er balalar kúızelisten shyǵý úshin bir adal dosy kerek ekenin aıtsa, qyzdar kóbinese jaqyn dosy, qurbysy bola tura esirtki qabyldap, ishimdik iship qaıǵysyn jeńildetýge tyrysqanyn aıtyp bergen. Mamandardyń aıtýynsha, qyz balalar qıynshylyqqa kezikse, kóbine ózin kináli sanaıdy, al, er balalar ózin kináli sanaǵannan góri qıyndyqty jeńýdiń basqa tásilderin qarastyrady. Mundaıda otbasynyń qoldaýy da mańyzdy. Óıtkeni, áleýmettik jaǵynan az qamtylǵan otbasynan shyqqan jastar aqshaly otbasylardyń balalaryna qaraǵanda, múmkindikteri az, densaýlyqtary nasharlaý keledi. Sondyqtan, ondaıda jaqyn dostyń kerektigin umytpaý kerek. Sonda ǵana olardyń ózine senimi kúsheıedi. Bul tek, kedeı balalar úshin ǵana emes, barshasyna da ortaq degen ǵalymdar balanyń tııanaqsyz, ár ortada bir júrgenin tyıyp, bir jaqyn dosymen syrlas bolýǵa úıretý kerek degen tujyrym jasaǵan.
