Ǵalymdar: jańǵaqtardy tamaqqa paıdalaný birqatar aýrýlardan bolatyn ólim qaýpin tómendetedi
ASTANA. QazAqparat - Kúnine 15 gramǵa jýyq jańǵaqtar nemese jerjańǵaqty tamaqqa paıdalaný keıbir aýrýlardan bolatyn ólim qaýpin edáýir tómendetedi, delingen Oksford ýnıversıteti (Ulybrıtanııa) baspasynyń baspasóz paraqshasynda.
«Ólimniń aıtarlyqtaı tómendeýi kúnine 15 gramǵa jýyq jańǵaq nemese arahısti (shamamen jarty ýys) paıdalanǵannan keıin baıqalǵanyn atap ótý kerek. Bul qorytyndyny sondaı-aq buryn jarııalanǵan zertteýlerdiń taldaýy da rastaıdy», - deıdi Nıderlandynyń Maastrıht ýnıversıtetiniń qyzmetkeri Pıt van den Brandt (Piet van den Brandt).
Van den Brandt pen onyń áriptesteri júrgizgen zertteý neırodegeneratıvtik jáne respıratorlyq, obyr jáne dıabetke shaldyqqandar arasynda jańǵaq pen jerjańǵaqty únemi tamaqqa paıdalanǵandardyń arasynda ólim az kezdeskenin kórsetti, alaıda jerjańǵaq maıy ólim deńgeıine esh tıimdiligin tıgizbegen.
Jańǵaqtar men jerjańǵaqtardyń quramynda adam densaýlyǵyna oń áserin tıgize alatyn maıly qyshqyldar, dárýmender, taǵamdyq talshyqtar men basqa da zattar bar. Alaıda arahıs maıynda quramyndaǵy arahıstiń paıdasyn joıyp jibere alatyn maıly qyshqyldardyń zııandy trans-ızomerleri men tuz bar, dep shamalaıdy ǵalymdar.
Zertteý International Journal of Epidemiology jýrnalynda jarııalanǵan.
