Ǵalymdar: Úıdiń tuńǵyshy óziniń baýyrlaryna qaraǵanda aqyldyraq bolady
ASTANA. QazAqparat - Negizi, adamnyń alǵyr ári aqyldy bolýyna onyń neshinshi bolyp ómirge kelýi asa áser etpeıdi. Alaıda, úıdiń úlkeni - balanyń tuńǵyshynyń ózinen keıingilerge qaraǵanda IQ-i (ıntellekt koeffıtsıenti) joǵaryraq bolady. Bul týraly zertteý nátıjesin PNAS jýrnaly jarııalady.
Zertteýge AQSh, Brıtanııa, Germanııa elderinen 20 myńǵa jýyq adam qatysqan. Olardyń báriniń baýyr-qaryndastary nemese ini-sińlileri bolǵan. Qatysýshylar IQ, sondaı-aq psıhologııalyq testten ótken.
Zertteý qorytyndysy boıynsha, ǵalymdar adamnyń tez tiltabysqyshtyǵy, sezimtaldyǵy, mineziniń ashyqtyǵy, shynshyldyǵy jáne basqa da minez-qulyq qasıetteri onyń úıdiń neshinshi balasy ekendigine baılanysty bolmaıtynyn, alaıda tuńǵyshtardyń IQ kórsetkishi rasymen joǵaryraq bolatynyn anyqtady. Kórsetkish aıyrmasy shamamen 1,5 baldy quraıdy.
Zertteýshiler buǵan genetıkalyq jáne bıologııalyq faktorlardyń esh qatysy joq dep sanaıdy. Kerisinshe, bul jerde tárbıeniń yqpaly zor kórinedi. Kóp jaǵdaıda úıdiń kenjesin áke-shesheleri qatty erkeletip jiberedi de, oǵan tuńǵysh balasyna qaraǵanda kóbirek erkindik beredi. Osy sebepti sabaqtaǵy úlgerimi tyńǵylyqty qadaǵalanbaı qalady.
