Ǵalymdar: Uıaly telefon mı ragin týdyrmaıdy
ASTANA. QazAqparat - Avstralııa ǵalymdary sońǵy 30 jyldaǵy onkologııalyq dıagnozdarǵa taldaý júrgizip, uıaly telefondar obyr deńgeıine esh áser etpegen degen qorytyndy jasady. Zertteý nátıjesin Naked Science saıty jarııalady.
Uıaly telefondardyń kenetten kóbeıip ketýi mı ragi aýrýynyń kúrt artýyn boldyrmaǵan.
Zertteý barysynda avstralııalyq ǵalymdar 1982-2012 jyldar aralyǵyndaǵy 19 858 er adam men 14 222 áıeldiń dıagnozyn sarapqa salǵan. Osy aralyqta syrqattyń deńgeıi turaqty bolǵan. Qaterli isik 70 jastan asqan adamdarda jıi kezdese bastaǵan, alaıda bul úrdis uıaly baılanys keń taralǵannan 5 jyl buryn bastalǵan.
Zertteýshilerdiń málimetine sensek, Avstralııada alǵashqy uıaly telefondar 1987 jyly paıda bolǵan. Arada 20 jyl ótken soń ony turǵyndardyń 90 paıyzǵa jýyǵy qoldana bastaǵan.
Qaterli isiktiń kúrt ósýi 80-shy jyldary tirkelgen, alaıda bul uıaly baılanysqa qatyssyz, kerisinshe rakty anyqtaý ádisiniń jetildirilýine baılanysty.
