Ǵalymdar: tumaýdy Darvın ádisimen boljaýǵa bolady
ASTANA. QazAqparat - Nemis jáne amerıkalyq ǵalymdar aldaǵy mezgilde adamzatqa qaýip tóndirgen tumaý vırýsyn anyqtaýǵa múmkindik beretin model oılap tapty, dep jazady Gazeta.rý.
Jyl saıyn tumaýdan álem boıynsha jarty mıllıonǵa jýyq adam kóz jumady. DDSU sońǵy 60 jyldyń ishinde tumaý vırýstarynyń ózgerip otyrǵanyn, al oǵan qajetti vaktsınalardyń aýrýdyń aldyn alýda qaýqary jetkiliksiz bolyp otyrǵanyn aıtýda.
Osyǵan oraı Keln ýnıversıtetiniń professory Mıhael Lessıg Kolýmbııa ýnıversıtetindegi áriptesi Marta Lýkshamen birigip, tumaýmen aýyrǵannan keıingi taldaý negizinde tumaý vırýsynyń damýyn kórsetetin model oılap tapty. Qos ǵalym bul jańalyqty Nature jýrnalynda jarııalaǵan. Sondaı-aq Mıhael Lessıg pen Marta Lýksha A vırýsynyń damý baǵytyn Darvın ádisimen (aıryqsha beıimdelgen túrtkileý) baqylaýǵa tyrysqan. Atap aıtqanda, zertteýshiler 1994 jyldan 2012 jyldyń aralyǵyndaǵy vırýstyń ózgerý algorıtm esebin qurastyryp, nátıjesinde óz modelderin jasaǵan. Atalmysh eseptik kórsetkishterdiń qorytyndysy DDSU mamandarynyń boljamynan qaraǵanda naqty nátıje bergenin kórsetti.
Ǵalymdardyń paıymynsha, bul model jyldam damyp jatqan patogenderdi boljaýda da paıdaly bola alady jáne aýrýdy der kezinde jeńetin vaktsınany jasaýǵa múmkindik beredi. Degenmen, jańa modeldi qoldanysqa engizbes buryn jaqsylap tekseristen ótkizý kerek. Bul ádis tek aldaǵy maýsymǵa ǵana boljam jasaı alady. Óıtkeni, vırýs túrleri qarqyndy ózgerip keledi.
