Ǵalymdar tirshilik bolýy múmkin eki ǵalamshardy anyqtady
ASTANA. 20 sáýir. QazAqparat - NASA ǵalymdary tirshilik úshin barlyq jaǵdaılary bar eki ǵalamshardy anyqtady, dep habarlaıdy Ýtro.rý Science jýrnalyna silteme jasap.
Olar Kepler teleskobynyń kómegimen tabyldy. Ǵarysh deneleri jerden 1200 jaryq jyly qashyqtyǵynda ornalasqan jáne Kepler 62 juldyzyn aınalyp júredi. Osyǵan baılanysty ǵalamsharlarǵa Kepler 62f jáne Kepler 62e ataýlary berildi.
«Osy jańalyqtardy eskere otyryp, bizdiń Jer tirshiligi bar jalǵyz ǵalamshar bolmaýy múmkin», - deıdi Sonoma (Kalıfornııa) ekologııalyq zertteýler ınstıtýtynyń qyzmetkeri Tomas Barkleı.
Kepler 62f Jerge qatty uqsaıdy. Ol bizdiń ǵalamshardan 40%-ǵa úlkenirek. «Onda qurlyq, sý bar. Ǵalamshar juldyzdy 267 kúnde tolyq aınalyp shyǵady», - dep atap ótti NASA mamany Ýılıam Borýskı.
Ekinshi ǵalamshar - Kepler 62e. Ol juldyzǵa jaqyn ornalasqan. Borýskı ony «sý álemi» dep atady. Ondaǵy jyl 122 kúnnen turady.
Sarapshynyń pikirinshe, Kepler 62f pen Kepler 62e osyǵan deıin tabylǵan ǵalamsharlardyń ishinen tirshilik úshin eń qolaıly mekender bolyp tabylady.
