Ǵalymdar teledıdarǵa telmirýdiń asa qaterli ekenin túsindirdi

ASTANA. QazAqparat - Ǵalymdar teledıdardy uzaq otyryp kórgen 50 jasqa deıingi adamdarda ishek obyry dertine shaldyǵýdyń joǵary qaýpi bar ekenin anyqtady, dep habarlaıdy EurekAlert.

Olar AQSh-ta 1989 jyldan beri jınalǵan negizgi sozylmaly aýrýlar úshin qaýipti faktorlar týraly málimetter bazasynyń eń iri qory - Meıirbıke densaýlyǵyn zertteýdiń ekinshi kezeńiniń nátıjelerin taldap shyqty. Ǵalymdar «qatysýshylardyń otyrý ádetterine», atap aıtqanda, olardyń «teledıdar aldynda telmirip» ótkizgen ýaqytqa nazar aýdardy.

Tikishek obyrynyń erte damýynyń 118 oqıǵasyn zerttegen ǵalymdar telebaǵdarlamalardy kórip ótkizgen bir saǵat ýaqyt aýrýǵa shaldyǵý qaýpin 12 paıyzǵa ósirgenin baıqaǵan. Al kún saıyn teledıdar aldynda eki saǵattan artyq otyrǵandardyń dertke shaldyǵý qaýpi 70 paıyz joǵary boldy.

Ǵalymdar anyqtalǵan bul zańdylyqtyń zertteýge qatysýshylardyń salmaǵy jáne fızıkalyq belsendiligimen, sondaı-aq, genetıkalyq faktorǵa baılanysty emes ekenin atap ótti.