Ǵalymdar smartfondardyń densaýlyqqa taǵy bir qaýpin anyqtady
ASTANA. QazAqparat - Koreı ǵalymdary smartfon ekrandary aldynda úsh saǵattan astam ýaqyt otyratyn balalarǵa qurǵaq kózder sındromy tónip turǵanyn dáleldedi, dep habarlaıdy QazAqparat.
Qurǵaq kózder sındromy adam aǵzasy kóz jasyn jetkilikti kólemde shyǵara almaǵan jaǵdaıda paıda bolady. Saldarynan adamnyń janary qyzaryp, titirkenedi. Olarǵa topyraq túsken tárizdi bolady.
Bul teorııany dáleldeý úshin koreılik ǵalymdar 7-12 jas aralyǵyndaǵy 916 balaǵa zertteý júrgizdi. Tekserý barysynda olardyń 6,6 paıyzynyń kóz janarynda sol ýaqytta atalmysh sındrom bolǵany anyqtaldy. Balalardyń barlyǵy derlik kúnine 3,2 saǵat boıy smartfondar paıdalanǵan. Bul rette, olardyń anaǵurlym deni saý qurdastary gadjetterdi qoldanbaǵan.
Koreılik ǵalymdar qurǵaq kózder sındromy men smartfondar aldynda ótkizgen ýaqyttyń arasynda baılanystyń baryna dáıekti dáleldemeler taba aldy.
Máselen, sındromǵa shaldyqqan balalarǵa bir aıǵa gadjetterden bas tartý usynyldy. Nátıjesinde, kesel sımptomdary tolyǵymen ǵaıyp bolǵan, dep jazady «Rossııskaıa gazeta».
The Independent sarapshylary smartfondardyń densaýlyqqa qaýipti áserinen óz balalaryn qorǵaǵysy keletin, biraq gadjetterdi olardyń ómirlerinen tolyǵymen alyp tastaı almaıtyn ata-analarǵa, óz balalaryna uıaly telefondy uıyqtar aldynda bermeýge, sondaı-aq qurylǵy aldynda eki saǵattan astam ýaqyt otyrmaýyn qadaǵalaýǵa keńes berdi.
